د بشري حقونو فعاله کالامارد، د بخښي نړیوال سازمان مشره سوه
۱۴۰۰ فروردین ۹, دوشنبه
نوموړي سازمان د دوشنبې په ورځ په لندن کي وویل: «کالامارد په داسي وخت کي د دغه سازمان مشره کیږي چي په ټوله نړۍ کي بشري حقونه په بې ساري ډول تر فشار لاندي دي. د هغې ځانگړتیا په زړه ورتوب او ځیرکتا کي ده.»
د ملگرو ملتونو د ځانگړي رپوټ ورکوونکي په توگه، کالامارد د سعودي ژورنالیست جمال قاشقجي د وژل کیدو دوسیه تر څېړني لاندي نیولې ده. دغه سیاستپوه وايي چي: «د بشري حقونو له پاره د امنیستني مبارزه تر پخوا ډیره مهمه ده. حکومتونه او شرکتونه هڅه کوي خپل جرمونه پټ او د منتقدینو خولې بندي کړي.»
کالامارد تر اوسه پوري د غیر قضايي، چټک او پر خپل سرو اعدامونو له پاره د ملگرو ملتونو رپوټ ورکوونکې وه. قاشقجي د ۲۰۱۸م کال په اکتوبر مياشت کي په استانبول کي د سعودي عربستان په قونسلگرۍ کي ووژل سو. دغي پیښي په ټوله نړۍ کي غبرگونونه راوپارول.
د سیاسي علومو د ډاکټري په حیث، کالامارد علاوه پر دې د مختلفو بشري حقونو سازمانونو او پوهنتونونو له پاره کار کړي دی.
کالامارد به دامنیستي انترنشنل د عمومي مشري جولي فیرهار ځای ناستې سي. مخکینۍ مشري، کومي نایدو د ۲۰۱۹م کال په دسمبر کي د صحي مشکلاتو له امله استعفا ورکړې وه. امنیستي د خپلو ارقامو له مخي، په ۷۰ هیوادونو کي د ۱۰ میلیونو ملاتړ کوونکو او ادارو په لرلو سره د نړۍ تر ټولو ستر سازمان دی. دغه سازمان په ۱۹۶۱م کال کي د بریتانوي حقوقپوه، پیتر بینیسون له خوا جوړ سو.
GP/NZ/AG