په پاریس کي دوه تنه د چړې په برید کې ټپیان سوي
۱۳۹۹ مهر ۴, جمعه
د رویترز خبري آژانس د فرانسې د پولیسو د یوې سرچینې له قوله لیکلي دي چي دوه تنه د شارلي ابدو د مجلې پخواني دفتر ته نژدې ټپیان سوي دي. تر دغه برید څو ودقیقې وروسته ځینو رسنیو په دغه پیښه کي د څلورو تنو د زخمی کیدو څخه رپوټ ورکړی وو.
شارلي ابدو په فرانسه کي د یوې طنزي مجلې نوم دی چی پخوا یې د اسلام د پغمبر د کاریکاتورونو په خپرولو سره جروبحثونه راپورته کړي دي. د نوموړي مجلې دفتر په ۲۰۱۵ م کال کي د یوه برید هدف وگرځید چي په نتیجه کي یې ۱۲ تنه ووژل سول.
د پولیسو یوې سرچینې له دغي پیښې لږ وروسته وویل چي د دوو تنو ټپیانو حالت د اندیښنې وړ دی. دغه سرچینه همدارنگه زیاتوي چي د برید دوه تنه شکمن کسان تښتیدلي او پولیسو په سیمه کي یو امنیتي کمربند جوړ کړی دی.
د پولیسو دوو سرچینو ویلی چي د پیښې په ځای کي یوه چاړه موندل سوې ده. یوه له دغو سرچینو څخه هغه یوه لویه چاړه بللې او هغه بلي بیا د غوښو له ساطول څخه یادونه کړې.
د سیمي چارواکو له خلکو غوښتي چي د پیښې په ځای کي له تگ راتگ څخه ډډه وکړي. د پاریس د ښار په شمال ختیځ کي پرته دغه سیمه کي تصفیوي عملیات هم دوام لري.
دغه برید د شارلي ابدو پر دفتر باندي د برید په تړوا د ۱۴ شکمنو کسانو د محکمې تر پیل دقیقاً درې اونۍ وروسته رامنځته سوی. د ۲۰۱۵ م کال په جنورۍ کي پر دغه دفتر باندي یو برید ترسره سو چی ۱۲ تنو پکښي خپل ژوند له لاسه ورکړ.