بلجیم کې اسلام ضد دنمارکیان تر نیول کیدو وروسته اخراج شوي

پنځه تنه اسلام ضد دنمارکي فعالان په بلجیم هیواد کې تر نیول کیدو وروسته له دغه هیواد څخه اخراج شوي دي. په بلجیم کې د پناهندګۍ او مهاجرت چارو معین سمیع مهدي، د معلوماتو له مخې پر دغو کسانو شک کیده چې غواړي د قران کریم په سوځولو سره په بلجیم کې مسلمانان را وپاروي.

نیول شوي کسان د "Stram Kurs" په نامه په دنمارک کې د یوه اسلام دښمنه ګوند غړي دي. دا خبره د دوی په فیسوک پاڼه کې لیکل شوې ده.

د بلجیمي چارواکو د اټکل له مخې دغې ډلې د پلازمېنې پروکسل د مولن بیک ښار په یوه برخه کې چیرې چې ډیر شمیر مراکشي مسلمانان ژوند کوي قرآن کریم ته د اور اچولو پلان درلود.

مهدي د پنچشنبې په ورځ وویل : «لا ترمخه زموږ په ډیره قطبي شوې ټولنه کې داسې خلکو ته ضرورت نه لرو، چې دلته راځي او کرکه را پاروي.» نوموړي دغه کسان د «بلجیم د عامه نظم له پاره یو جدي خطر وبلل».

د فرانسې خبري آژانس د قضایي کړیو په حواله ویلي دي چې دغه قضیه د بروکسل عمومي څارنوالۍ ته سپارل شوې ده. په دنمارک هیواد د "Stram Kurs"  ګوند د راسموس پالو دان، په نوم د یوه سیاستوال او مدافع وکیل له خوا رهبري کیږي.

د دغه ګوند د فیسبوک پاڼې په حواله پالودان، په خپله په فرانسه کې تر نیول کیدو وروسته له دغه هیواد څخه اخراج شوی دی.

مخکې تر دې نوموړي پر همدې انټرنټي پلیټ فارم (فیسبوک) کې اعلان کړی وو چې د نومبر میاشتې په ۱۱ نیټه د پاریس په طاق ظفر یا د بریا دروازه کې د قرآن کریم یوه نسخه سوځول غواړي.

"Stram Kurs" په سکاندنیاوي هیوادونو کې د پارونکو او اسلام ضد اقداماتو له کبله مشهور دی. تیر کال راسموس پالودان، هغه وخت د خبرونو په سرټکو کې ځای ونیو، چې د قران کریم یوې نسخې ته یې اور اچولی وو.

آژانسونه: ش.ن/ س.ر