په هندوستان کې ځمکې ښویدنې او سیلابونو ۲۵ تنه وژلي
۱۴۰۰ مهر ۲۶, دوشنبه
د یکشنبې په ورځ د هندوستان چارواکو وویل چې د دې هیواد په جنوب لویدیځ کې تر شدیدو بارانونو وروسته د سیلابونو او ځمکې ښويدنې په پایله کې لږ تر لږه ۲۵ تنه وژل شوي دي. چارواکو همدا راز زیاته کړې چې د نورو انسانانو د ژغورنې له پاره د ژغورنې عملیات ادامه لري او دا چې په دې عملیاتو کې د هندوستان پوځ هم ګډون لري.
د هندوستان په ساحلي کېرالا ایالت کې د جمعې ورځې تر شدیدو بارانونو وروسته ویالې او خوړونه له اوبو ډک شول او ان په ځینو سیمو کې اوبه سړکونو ته را ختلي دي. د دې ایالت چارواکو د فرانسې خبري آژانس ته ویلي چې تر اوسه پورې د ایډوکي په ولسوالۍ کې د ۱۱ کسانو جسدونه موندل شوي دي او د کوټایام په سیمه کې بیا د ۱۴ تنو نورو جسدونه هم موندل شوي دي.
د کېرالا ایالت لومړي وزیر پیناریي ویجایان د یکشنبې په ورځ وویل چې له سیلاب ځپلو سیمو څخه زرګونه کسان نورو خوندي سیمو ته انتقال شوي دي او دا چې د دوی له پاره لږ تر لږه ۱۰۰ موقت کمپونه هم جوړ شوي دي. چارواکي وايي چې د ژغورنې په عملیاتو کې د هند سمندري، هوايي او ځمکني پوځ ګډون لري خو تر اوسه پورې د لادرکه کسانو د شمیر په هکله معلومات په لاس کې نه شته.
د سیمې یوه اوسیدونکي د کېرالا نیوز په نامه تلویزیوني چینل ته ویلي چې «دا مې ژوند وو. هر څه ولاړل په اوبو لاهو شول.» د سیمې یوې میرمنې بیا ویلي چې «زموږ سیمې ته نیږدې تپه را وښویده. ډیر زیانونه اوښتي دي. کورونه ویجاړ شوي. ماشومان هم لمنځه تللي دي.»
بل لوري ته د هندوستان لومړي وزیر نریندرا مودي بیا د یوه ټویټري پیغام له لارې له ځپل شویو کسانو سره خپله خواخوږي څرګنده کړې او زیاتوي چې چارواکي له زیانمنو شویو کورنیو سره مرسته کوي.
د هندوستان د هوا پیژندنې اداره اټکل کوي چې په راتلونکو دوو یا دریو ورځو کې به د هند په همالیا سیمه، هماچل پردیش او اوتراکنډ سیمو کې بیا هم شدید بارانونه ووریږي. په ۲۰۱۸م کال کې په همدې کېرالا ایالت کې د شدیدو بارانونو په نتیجه کې نیږدې ۵۰۰ کسان وژل شوي وو.