منځنی ختیځ: ملګرو ملتونو پر سوله ساتي ځواک بريدونه غندلي

د ملګرو ملتونو د امنيت شورا د لبنان په جنوب کې د ملګرو ملتونو پر سوله ساتي ځواک باندې څو ورځې دمخه د ترسره شويو بريدونو په اړه «سخته اندېښنه» ښوولې ده. په سيمه کې د نښتو په ترڅ کې د ملګرو ملتونو ۵ شنه خولۍ عسکر ټپيان شول.

د دوشنبې په ماښام په نيويارک کې تر يوې غونډې وروسته د ملګرو ملتونو امنيت شورا «د سيمې له امنيت سره د مرستې» په برخه کې د دې ماموريت له نقش څخه پر خپل ملاتړ ټینګار وکړ.

په دې وروستيو ورځو کې په لبنان کې د ملګرو ملتونو د موقت ځواک « UNIFIL» سوله ساتي، د لبنان په جنوب کې د اسرائيل د پوځ په فېرونو کې په داسې حال کې ټپيان شول چې دوی په خپلو پوستو کې ول.

د ملګرو ملتونو په حواله د يکشنبې په ورځ په يوه د پام وړ پېښه کې د اسرائيل دوو ټانکونو د UNIFIL ځواکونو د يوې اډې دروازې ور ماتې کړې وې. په دې ترڅ کې لږ تر لږه ۵ سوله ساتي عسکر ټپيان شول خو اسرائيل وايي قضيه داسې نه وه لکه ملګري ملتونه یې چې وړاندې کوي.

په ملګرو ملتونو کې د سويس استازي پاسکال بيریسويل، وويل چې د امنيت شورا غړي پر ټولو ښکيلو اړخونو غږ کوي چې د ملګرو ملتونو د يونفل ماموريت او ملګرو ملتونو د ټولو ودانيو امنيت او محافظت ته بايد درناوی ولري.» پاسکال بيریسويل، دمګړۍ د امنيت شورا د دوره يي مشر دنده ترسره کوي.

 نوموړي وويل: «دوی يادونه کوي چې د ملګرو ملتونو سوله ساتي عسکر او د ملګرو ملتونو تاسيسات بايد د هیڅ يوه بريد هدف ونه ګرځي.»

د ملګرو ملتونو پر ماموريت د اسرائيل نيوکې

په لبنان کې د ملګرو ملتونو دغه ماموريت دنده لري چې د لبنان په جنوب کې د حزب الله په ګدون د مليشو د خلع سلاح کولو له هلو ځلو څخه ملاتړ وکړي او د لبنان له پوځ سره پر هغو سيمو باندې د کنترول په ساتنه کې مرسته وکړي چې له اسرائيل پولې سره ډېرې نږدې پرتې دي.

اسرائيل پر دې سوله ساتي ځواک نيوکه کوي چې له سيمې څخه د وسلې او حزب الله د جنګيالو په لېرې کولو نه دی توانيدلی، هغه څه چې د دغه ماموريت اصلي دنده ده.

د اسرائيل لومړي وزير بنيامين نتانياهو، د دوشنبې په ورځ د ملګرو ملتونو د يونيفل پر عسکرو غږ وکړ چې د پوځي عملياتو پر وخت دې سرحد ته له څېرمه پرتو سيمو څخه ووځي.

نوموړي پر حزب الله تور ولګاوه چې په قصدي توګه دغو عسکر ته په نږدې پاتېدو سره هغوی د «انساني سپر» په توګه کاروي.

خو سوله ساتي ځواک په څو ځلي ويلي دي چې په خپلو ټولو پوستو کې به پاتې شي.

د ملګرو ملتونو د سوله ساتونکو عملياتو مشر ژان پيرير لاکروا، وويل: «پريکړه شوې ده چې UNIFIL به دمګړۍ پر ټولو پوستو کې پاتې شي. که څه هم اسرائيل د شنې کرښې په اوږده کې د پرتو پوستو د تخيلیه کولو غوښتنه کړې ده.»

استراليا پر څو ايراني اشخاصو تازه بندیزونه وضع کړي

د استراليا د بهرنيو چارو وزیرې پېني وونګ، وويل چې د استراليا حکومت پر هغو پنځو ایرانيانو مالي او سفري بندیزونه وضع کوي چې د هېواد د توغنديو په دفاعي پروګرام کې ونډه لري.

نوموړې وويل چې د اکتوبر پر لومړۍ نیټه پر اسرائيل باندې د ایران له لوري د لږ تر لږه ۱۸۰ باليستيک توغنديو توغول «يو خطرناک عمل وو چې د يوې پراخې سيمه ایزې جګړې خطر یې لوړ کړی دی.»

دا تازه بندیزونه د ایران د « Aerospace Industries Organization» يا فضايي صنايعو سازمان پر دوو مشرانو او يوه لوړپوړي افسر لګول شوي دي. همدا راز د شهيد باقري صنعتي ډلې مشر او د شهيد همت صنعتي شرکت سوداګریز مشر هم د بندیزونو هدف شوي. 

په دې توګه له ایران سره د تړاو لرونکو کسانو شمير چې استراليا ورباندې بندیزونه لګولي دي، ۲۰۰ تنو ته لوړ شوی.

وونګ وويل: «استراليا به دې ته دوام ورکړي چې ايران د خپلو بې پروا او بې ثباته کوونکو اقداماتو له کبله ځواب ويلو ته راکش کړي.»

ب. ص/ ن. ز (AP, AFP, dpa, Reuters)