د اسلامي همکاریو سازمان له ازبکستان سره پر افغانستان غږېدلی
۱۴۰۲ آذر ۴, شنبه
افغانستان لپاره د اسلامي همکاریو سازمان ځانګړي استازي طارق علي بخیت پلازمینه تاشکند کې افغانستان لپاره ددغه هېواد له ځانګړي استازي عصمت الله اریغاشوف سره کتلي دي.
د اسلامي همکاریو سازمان یا OIC پرخپله اکس پاڼه لیکلي: «دواړو اړخونو افغانستان کې د اقتصادي او انساني بحران د کمولو برخه کې په دوه اړخیزو همکاریو ټینګار کړی دی.»
سرچینه زیاتوي چې د افغانستان په اړه د اسلامي همکاریو سازمان د پریکړه لیک په اړه باید په هغه هېواد کې له واکمنو چارواکو سره عملي خبرې وشي.
ددغه سازمان پریکړه لیک کې د نورو ډېرو مسایلو ترڅنګ هلته د بشري حقونو په ځانګړي توګه د ښځو د کار او نجونو د زده کړو د حق پر رعایت ټینګار شوی دی.
د اسلامي همکاریو سازمان وايي، ازبیکستان سره په ګډه د افغانانو ملاتړ ته دوام ورکوي.
د اسلامي همکاریو سازمان په تېره سپټمبر میاشت کې ویلي ول چې د طالبانو حکومت سره یې د ښځو کار او د نجونو د زده کړو په اړه خبرې کړي، خو بیا وروسته ددې خبرو پایلو په اړه جزیات رسنیو ته راونه وتل.