طالبان: د الظواهري مړی مو نه دی موندلی

امریکا متحده ایالاتو تیره میاشت ویلي ول چې په کابل کې یې د یوې بې پیلوټه الوتکې په برید کې د القاعده شبکې مشر ایمن الظواهري وژلی وو.

تیره میاشت د امریکا متحده ایالاتو ولسمشر جو بایدن ویلي ول چې د القاعده شبکې مشر ایمن الظواهري په کابل کې د یوه کور په بالکن کې د امریکا د بې پیلوټه الوتکې په برید کې وژلی دی.

امریکايي چارواکو د هغه وژنه د القاعده شبکې د پخواني مشر اسامه بن لادن تر وژلو وروسته یادې شبکې ته یو ستر ګوزار بللی وو.

اسامه بن لادن د ۲۰۱۱م کال د مې میاشتې پر ۲مه نېټه د پاکستان په ایبټ آباد کې د امریکا د ځانګړو ځواکونو د عملیاتو په ترڅ کې وژل شوی وو.