پاکستان: سږ کال د پولیو د مثبتو پیښو شمیر ریکارډ ته رسیدلی
۱۴۰۳ مهر ۱۹, پنجشنبه
په پاکستان کې د پولیو د لمنځه وړلو ملي بیړني مرکز چارواکي انور الحق، وايي چې په دغه هیواد کې د روان میلادي کال له مارچ مياشتي راهیسې د ګوزڼ یا د ماشومانو د فلج کیدو ۳۲ مثبتې پیښې ثبت شوي دي. د نوموړي په وینا په پاکستان کې به د اکتوبر میاشتې له ۲۸ نیټې وروسته په ټول هیواد کې د شاوخوا ۳۲ میلیونه ماشومانو له پاره د پولیو واکسین سرتاسري واکسین پیل شي او هیله ښيي چې په دې توګه به په راتلونکو میاشتو کې وضعیت لا ښه شي.
انورالحق وویل: «موږ په ګډه د [پولیو] د قضیو پلټنه کوو، باکیفیته واکسینونه تطبیق کوو او له ډیر خطر سره مخامخ ټولنو کې نور صحي خدمات هم وړاندې کوو څو د ناروغیو پر وړاندې د ماشومانو مقاومت لا پسې لوړ کړو.»
په عین وخت کې په باکستان کې د پولیو پر واکسیناتورانو باندې هم وخت ناوخت خونړي بریدونه کیږي او د دوی په باور د پولیو یا ګوزڼ ضد واکسین د مسلمانانو پر ضد د غربي نړۍ یوه دسیسه ده چې غواړي مسلمانان شنډ کړي.
د شمیرو له مخې په پاکستان کې د پولیو زیاتره مثبتې پیښې په بلوچستان او د دې هیواد په شمال ختیځ او شمال لویدیځ سیمو کې ثبت شوي دي. افغانستان او پاکستان په نړۍ کې هغه دوه هیوادونه چې پکې دغه وژونکي ناروغي هیڅکله هم په بشپړه توګه له منځه نه ده وړل شوې.
په پاکستان کې د پولیو یا ګوزڼ ضد واکسین کمپاین د بیل او میلنډا بنسټ له لوري چې د مایکروسافټ شرکت د څښتن اړوند دی، په مالي مرسته کیږي. دغه بنسټ په ټوله نړۍ کې د پولیو ناروغۍ د لمنځه وړلو له پاره ۱ اعشاریه ۲ میلیارده ډالرو مالي مرستو ژمنه کړې ده.
زموږ له آرشيف څخه: