روسیې او ایران د رشت- استارا د ریل پټلۍ موافقه لاسلیک کړه
۱۴۰۲ اردیبهشت ۲۷, چهارشنبه
د روسیې ولسمشر ولادیمیر پوتین او د ایران ولسمشر ابراهیم رئیسي په یو ویډیویې کنفرانس کې د رشت- استارا په نوم اورګاډي پټلۍ د جوړولو موافقتنامې د لاسلیک کیدو مراسم وڅارل. د اورګاډي دغه لیکه ۱۶۲ کیلومتره اوږدوالی لري.
د «جی۷» اعلامیه: ایران دې روسیې ته د وسلو استول بند کړي
د رویټرز خبري آژانس د رپوټ پر بنسټ د رشت- استارا اورګاډي لیکه د شمال- سویل د حمل و نقل په نړیوال کوریدور کې یوه مهمه حلقه یا کړۍ ګڼل کیږي چې هند، ایران، روسیه، اذربایجان او یو شمیر نور هیوادونه د اورګاډي لیکې یا پټلۍ له طریقه یو له بل سره نښلوي.
د ایرنا د رپوټ پر بنسټ پوتین د رشت- استارا ستراتیژیک پټلۍ جوړیدو سند د لاسلیک کیدو مراسمو پر مهال وویل: «د حمل و نقل دغه کوریدور په ایران او د فارس خلیج حوزې په هیوادونو کې د غذایي امنیت د تامین په برخه کې د پام وړ ونډه لري.»
ایران له روسیې جنګي جیټ الوتکې اخلي
د روسیې ولسمشر هیله څرګنده کړه چې د دې مسیر په جوړیدو سره به خوراکي توکي او نور محصولات د کسپین حوزې او فارس خلیج د څنډې هیوادونو ترمنځ تبادله شي.
نوموړي زیاته کړه چې دا کوریدور د شمال- جنوب مسیر د ظرفیت زیاتولو له پاره یوازې یو پیل دی: «نور مسیرونه هم شته چې وروسته به پراختیا ومومي.»
د روسیې ولسمشر وویل چې د مستقیم او بې وقفې لیږد رالیږد د دې مسیر رامنځته کول ډیر مهم دي چې موخه یې د فارس خلیج په څنډه کې له ایراني بندرونو او همدارنګه له هند سمندر سره د روسي بندرونو نښلول دي.
د ایران او يوروایشیا ترمنځ د تعرفو حذفول
ابراهیم رئیسي له روسیې او يوروایشیا (EAEU) غړو هیوادونو سره همکارۍ پراختيا ته په اشارې سره وویل، بل ګام چې ژر به پورته شي، د شپږو هیوادونو ترمنځ د تعرفو لمنځه وړل به وي.
د ایران ولسمشر د اورګاډي د کورویدور د درو برخو ختیځ، مرکزي او لویدیځ څخه یادونه وکړه. ختیځه برخه کې یې روسیه، قزاقستان، ترکمنستان او ایران شامل دي چې د هغه په وینا د نن ورځې په هڅو د ګټې اخیستنې وړ وګرځید.
د ایران او روسیې مخ پر ډیریدونکي دفاعي مشارکت امریکا انديښمنه کړې
رئیسي د مرکزي برخې یادونه وکړه چې د کسپین سمندر ساحه په کې شاملیږي او وایي چې د بندرونو او بیړیو د تقویه کولو په برخه کې باید جدي ګامونه پورته شي. نوموړي بیا د دې مسیر لویدیځ برخې ته اشاره وکړه او وې ویل چې په دې برخه کې د رشت او استارا ترمنځ د اورګاډي لیکې نیمګړتیا موجوده وه چې د نن ورځې په موافقتنامې سره دغه نیمګړتیا له منځه لاړه.
رئیسي د شمال- جنوب کوریدور یو ډیر ارزانه او نزدې مسیر وباله چې ټول ګاونډي هیوادونه به له دې مسیر څخه ګټه پورته کړي.
آژانسونه: ش.ن/ ن.ز