روسیې د توغندې آزموینه وکړه؛ امریکا یې ګواښ نه ګڼي
۱۴۰۱ اردیبهشت ۱, پنجشنبه
روسیې د چهارشنبې (د اپریل میاشتې ۲۰مه نیټه) په ورځ اعلان وکړ چې د «سرمت» په نوم د بین البراعظمي بالیستیک توغندیو لومړی آزموېنه یي ترسره کړې ده. د امریکا د دفاع وزارت یا پنټاګون د دې په غبرګون کې ویلي دي چې روسیې د اټومي تړون له مخې د دې آزماېښت په اړه لا مخکې نړیوال شریکان خبر کړي وو او دا د امریکا او متحدینو له پاره یي «ګواښ» نه ګڼل کیږی.
روسي چارواکو د نوي توغندي د آزموېنې پر مهال څه وویل؟
د روسي پوځ د اعلامیې له مخې د اټومي سرګلولې د لیږد وړتیا لرونکی «آی سي بي ایم» توغندی د چهارشنبې په ورځ په آزمایشې ډول د مسکو پر وخت نږدې ۳ بجې او ۱۵ دقیقې په شمال لویدیځ ارخانګ لسک سیمه کې له بالستسک فضایي پایګاه څخه وتوغول شو.
د روسیي پوځ تر آزموینې وروسته وویل: «دا د حکومت د آزمایښتې پروګرام لومړۍ توغونه ده. د ازمایښتي پروګرام تر بشپړیدو وروسته به د سرمت توغندیو آزمویل شوی سیستم د ستراتیژیکو توغندیو ځواک یوه برخه وي.»
روسي ولسمشر ولادیمیر پوتین وویل چې تر ډیرې مودې به په نړۍ کې د سرمت ټوغندي مثل نه وي او هغه خلک چې غواړي روسیه وګواښي «هغوي به مجبوه وي چې یو وار بیا فکر وکړي».
ولسمشر پوتین پخپله تلویزونې وینا کې وویل: «زه د سرمت بین البراعظمي بالیستیک توغندیو د بریالۍ آزموېنې له کبله تاسې ته مبارکي درکوم.»
نوموړي زیاته کړه: «دا ځانګړې وسله زمونږ د وسله والو ځواکونو جنګي وړتیا پیاوړې کوي او د بهرنیو خطرونو پر وړاندې به د روسیې ساتنه په د باور وړ شکل تضمین کړي او هغه کسان چې په تیری کوونکو الفاظو سره زمونږ د هیواد د ګواښلو کوښښ کوي، هغوي به مجبوره کړې چې یو وار بیا فکر وکړي.»
د روسیې د فضايي ادارې مشر دیمتري روګوزین دا آزموېنه د «ناټو له پاره یوه تحفه» بللې ده. د روسیې دفاع وزارت ویلي دي چې دا توغندی به د هیواد د اټومي وړتیا توان لا زیات کړي.
د دغې اعلامیې په اساس «سرمت توغندی داسې ځانګړي خصوصیتونه لري چې اوس او په راتلونکې کې به د توغندیو تر هر ډول دفاعي سیستم برلاسی وي.»
د آزمایښت په اړه د امریکا غبرګون څه و؟
د امریکا د بهرنیو چارو وزارت د دې په غبرګون کې ویلي دي چې دوی «دغه آزمايښت ته د امریکا او متحدینو له پاره د خطر په توګه نه ګوري.»
د پنټاګون ویاند جان کیربي، ویلي دي چې د اټومي وسلو د مسئولیتونو پر اساس روسي چارواکو د معمول مطابق تر آزموینې مخکې واشنګټن ته اطلاع ورکړې وه. کیربي وویل چې دا آزموېنه کومه حیرانوونکې خبره نه ده.
ویل کیږي چې د روسیې د دغه نوي توغندي د جوړولو چارې له څو کلونو راهیسې روانې وې. مسکو دا آزموېنه د خپل ملي بریا ورځې له مراسمو څخه څو اونۍ مخکې ترسره کړې.
د روسیې د بریا ورځ د می میاشتې په نهمه نیټه د دویمې نړیوالې جګړې د پای ورځې سره سمون خوري او په دغو مراسمو کې د یوه پوځي رسم ګذشت په ترڅ کې پخوانیو روسي عسکرو ته د درناوي مراسم ترسره کیږي.
آژانسونه: ش.ن/ م. ج