رپوټ: افغان میرمنې له بې رحمه تګلارو سره مخ دي
۱۴۰۲ شهریور ۲۴, جمعه
د امریکا د سولي انستیتیوت په خپل نوي رپوټ کې افغانستان کې د طالبانو دوه کلنې واکمنۍ ته د "جنسیتي اپرتاید " یا "جنسیتي تبعیض " سرلیک ورکړی.
په رپوټ کې راغلي: «افغان میرمنې او نجونې د طالبانو د دغه ظالمانه تګلارو پرضد د مقاومت د دوام په موخه ټینګ اخلاقي ملاتړ ته اړتیا لري.»
د امریکا د سولې انستیتیوت ویلي، د بشري حقونو څار سازمان په خپل وروستي رپوټ کې داسې شواهد موندلي چې طالبان د ښځو ضد تګلارو په دوام د بشریت ضد جنایت ترسره کوي.
د یوې بلې لارې د موندلو هڅې
دغه رپوټ چې د سولې انستیتیوت پر خپله ایکس پانه هم خپور کړی زیاتوي د افغانستان ډیری اوسېدونکي د ښځو پرضد د طالبانو محدودیتونو سره مخالف دي او داسې رپوټونه شته چې یو شمېر ځايي ټولنې په خاموشی سره د یوې بلې لارې په لټه کې دي.
د سولې انستیتوت په رپوټ کې نه ده په ډاګه شوې چې دا ټولنې په کومه کچه او څه ډول لارې چارې لټوي؟
د سولې انستیتیوت وايي، افغان میرمنې چمتو نه دي چې د تېرو شلو کلونو لاسته راوړنې په دومره اسانی له لاسه ورکړي. رپوټ زیاتوي: «ډېری میرمنې د طالبانو د زورزیاتي سربیره هم په زړورتیا سره واټونو ته راووتې او د خپلو بنسټیزو حقونو غوښتنه یې وکړه.»
د امریکا د سولې انستیتیوت په وینا طالبانو په خپله دوه کلنه واکمنۍ کې ټولې هغه ژمنې تر پښو لاندې کړې، چې د دوحې په تړون کې یې کړې وې.
دا رپوټ داسې مهال خپور شوی چې د طالبانوحکومت د لوړو زده کړو ځای ناستي وزیر مولوي ندا محمد ندیم په افغان میرمنو د صبر او زغم غږ کړی.
نوموړي د طالبانوتر ولکې لاندې د افغانستان ملي ټلویزون سره په مرکه کې ویلي د طالبانو حکومت د اسلامي شریعت په رڼا کې د ښځو ټولو حقونو ته ژمن دی.