«اوکراين کې د شمالي کوريا ۳۰۰۰ عسکرو ته مرګ ژوبله اوښتې»

د جنوبي کوريا استخباراتي ادارې ويلي دي چې د اوکراين پر وړاندې د روسیې په جګړه کې د شمالي کوريا د عسکرو د تلفاتو شمير تر ۳۰۰۰ لوړ شوی دی.

د جنوبي کوريا د پارلمان استازي لي سيونګ – کوين، له استخباراتي ادارې سره تر يوې معلوماتي غونډې وروسته خبريالانو ته وويل: «د رپوټونو پر اساس روسیې ته د شمالي کوريا د عسکرو استقرار د کورسک سيمې ته د غځولو په موخه پراخ کړل شوی دی او داسې اټکل کيږي چې د شمالي کوريا د عسکرو د مرگژوبلې شمیر تر ۳۰۰۰ اوښتی وي.»

لي، زياته کړه چې «تقريباً ۳۰۰ کسان وژل شوي او ۲۷۰۰ نور ټپيان دي.»

د تېر میلادي کال په اکتوبر میاشت کې د جنوبي کوريا ملي استخباراتي ادارې ویلي ول چې شمالي کوريا روسیې ته په اوکراين کې د جنګېدو په موخه کابو ۱۲۰۰۰ عسکر استولي دي.

اړونده موضوغ: شمالي کوریا د اوکراین ماموریت له پاره د سرتیرو استولو رپوټ رد کړ

په جون میاشت کې د شمالي کوريا او روسیې د حکومتونو ترمنځ لاسليک شوی يو تړون له دسمبر میاشتې څخه عملي شوی دی. دا تړون دواړې غاړې مکلفوي چې د بل په خاوره به حملې په صورت کې پوځي مرستې مرسته کوي او دا چې د لوېدیځ بندیزونه به په ګډه دفع کوي.

زيلنسکي شمالي کوريا ته د بنديانو د تبادلې وړاندیز کړی

د اوکراین ولسمشر ولوديمير زيلنسکي، د يکشنبې په ورځ وويل دی چمتو دی چې د شمالي کوريا واکمن کيم جونګ اون، ته د دغه هېواد عسکر د اورکرايني زندانيانو په بدل کې چې په روسيه کې بنديان دي، وسپاري.

زیلنسکي، د ټولنیزو رسنیو له لارې ويلي: «د شمالي کوريا پر لومړي نيول شوي سرتیري سربیره به پرته له شکه نور [نيول شوي عسکر] هم موجود وي. دا يوازې د وخت خبره ده چې زموږ ځواکونه نور هم ونيسي.»

د اوکراين ولسمشر يوه ويديو هم خپره کړه چې په هغه کې د جنوبي کوريا له دوو جنګي بنديانو څخه د پوښتنو ګرويږنو صحنې ليدل کيږي.

زيلنسکي، زياته کړې ده چې د شمالي کوريا د هغو عسکرو له پاره به نور انتخابونه هم موجود وي چې نه غواړي بيرته ستانه شي او «هغوی ته به چې په خپله ژبه [کوريايي ژبه] د رښتيا په خپرولو سره د سولې د راوستلو هیله لري، دا فرصت ورکړل شي.»