رپوټ: تر۲۰ ډېر هیوادونه له سختي لوږي سره مخامخ دي

دغه خبره د ملګرو ملتو د خوړو او زراعت سازمان (FAO) او د نړۍ غذايي پروګرام (WFP) د سې شنبې په ورځ (۲۰۲۱م کال د مارچ میاشتي ۲۳) په روم کي کړې او خبرداری یې ورکړی دی چي تر۲۰ ډیر هیوادونه به په راتلونکو څو میاشتو کي له سختي لوږي سره مخامخ سي.

د ډبليو اف پي امریکايي آمر، ډېوید بېسلي ویلي: « موږ وینو چي څرنګه زموږ د سترګو په مخکي یو آفت رامنځته کیږي او پراختيا مومي.» خصوصاً بيا په هغو هیوادونو کي د اړمنو خلګو حالت ورځ په ورځ نور هم خرابیږي، چي داخلي جنګونه روان دي، لکه یمن، جنوبي سوډان، نایجریا، افغانستان او نور.

که څه هم د بحراني هیوادونو لویه برخه د افریقا په براعظم کي پرته ده، خو د ملګرو ملتونو د اټکلونو پراساس به سخته لوږه د نړۍ په نورو هیوادونو کي هم ډیره زیاته سي. له هغې جملې څخه په افغانستان، سوريه، لبنان او هایتي کي.

د ملګرو ملتو د ارقامو پراساس همدااوس تر ۳۴ ميلیونه اضافه انسانان له سختي خوارځواکۍ سره مبارزه کوي چي د لوږي په سبب یې د مړه کیدو احتمال ډیر دی.

د ملګرو ملتو د خوړو او زراعت سازمان چینايي آمر، کو دانیو غوښتنه وکړه: «دا زموږ وظیفه ده، چي ژر تر ژره معامله او عمل وکړو، تر څو د خلګو ژوند وژغورو او د یوه خراب حالت د رامنځته کیدو مخنیوی وکړو.» هغه زياته کړه: «په ډیرو سیمو کي د زراعتي محصولاتو د راټولیدو وخت رارسیدلی او یا رانژدې کیدونکی دی.» ځکه نو اوس له وخت سره مبارزه ده.