«د امریکا د اطلاعاتو په مرسته د روسي جنرالانو وژل کیدل»
۱۴۰۱ اردیبهشت ۱۵, پنجشنبه
د نیویارک ټایمز په نامه امریکایي ورځپاڼې د چهارشنبه په ورځ د استخباراتي سرچینو په حواله رپوټ ورکړی چي متحده ایالات په ځانگړي ډول «د روسیې د پوځ اصلي او سیارې قرارگاوي» مشخصوي او د اوکراین وسله والو ځواکونو ته خبر ورکوي. د دغي ورځپاڼې په حواله دغه اطلاعات اوکراینیانو ته دا توان ورکړی چي نوموړي مرکزونه د توپخانه یي بریدونو هدف وگرځوي.
د امریکا متحده ایالاتو د امنیت شورا ټینگار کړی چي اوکراین ته د استخباراتي اطلاعاتو په ورکولو کي د دغه هیواد اصلي هدف، د روسي جنرالانو وژل کیدل نه دي. د دغي شورا ویاند ادرین واتسون، ویلي چي د امریکا متحده ایالاتو حکومت د جنگ په میدان کي اطلاعات د اوکراینیانو په اختیار کي ورکوي، څو په دې ډول له هغوی سره د خپل هیواد په دفاع کي مرسته وکړي. هغه ټینگار کړی چي: «موږ هیڅ ډول اطلاعات د روسي جنرالانو د وژلو په هدف په اختیار کي نه ورکوو.»
اوکراینیانو د روان کال د فبرورۍ پر ۲۴مه پر اوکراین باندي د روسیې د یرغل له پیل راهیسي د جگړې په میدان کي په وار وار سره د روسي جنرالانو له وژل کیدو څخه خبر ورکړی دی. د نیویارک ټایمز د رپوټ پر اساس د لسونو روسي قوماندانانو له ډلي څخه چی تر اوسه وژل سوي، ډیری یې د امریکا متحده ایالاتو د استخباراتي اطلاعاتو په مرسته د اوکراییني ځواکونو د بریدونو هدف گرځیدلي دي.
روسیې بیا د دغو جنرالانو وژل کیدل تر یو ځایه تأیید کړي دي. د مثال په ډول د مارچ میاشتي په اوایلو کي د روسیې په جنوب کي د نوورسیسک د ښار ښاروال خبر ورکړ چي د ۴۱ مي اردو لوا د قوماندان مرستیال جنرال اندرې سوخوویتسکي، په اوکراین کي په قهرمانانه ډول خپل ژوند له لاسه ورکړی دی.
امریکا متحده ایالاتو د اوکراین په ختیځ کي په یوه چاودنه کي د روسیې د پوځ د لوی درستیز والري گراسیموف، د زخمي کیدو په هکله د اوکراین د حکومت رپوټونه نه دي تأیید کړي. خو د امریکا متحده ایالاتو د دفاع وزارت د دوشنبه په ورځ وویل چي گراسیموف »څو ورځي« د اوکراین په ختیځ کي د جگړې په جبهه کي وو.
GP/SR/AG