آلمان په مارچ مياشت کې د داعش پرضد ماموریت پای ته رسوي
۱۳۹۸ آبان ۳, جمعه
د آلمان پارلمان د پنجشنبې په ورځ (۲۰۱۹م کال د اکتوبر ۲۴مه)، په سوریه او عراق کې د داعش ترهګرې ډلې پر ضد د دې هیواد د پوځي ماموریت د پای له پاره مثبته رایه کارولې ده. ټاکل شوې د آلمان د پوځ دغه ماموریت د ۲۰۲۰م کال په مارچ میاشت کې پای ته ورسیږي.
په دې ترڅ کې مسیحي ديموکراتان او سوسیال ديموکراتان بیا د ماموریت د پای په اړه سره هم نظره نه دي. مسيحي ديموکراتان په دې هڅه کې دي چې د داعش ډلې پرضد د آلمان پوځي ماموریت لا وغځیږي، خو سوسیال دموکراتان بیا غواړي چې د آلمان پوځ په دغه راز یوه نړیوال ائتلاف کې خپل نقش ته د پای ټکی کیږدي.
د آلمان د حکومت په ائتلاف کې شریک ګوند یعنې سوسیال ديموکرات ګوند د ماموریت د مودې له غځولو سره اختلاف لري او استدلال کوي چې د آلمان پخوانۍ دفاع وزیرې اورزولا فون دیر لاین له پارلمان سره ژمنه کړې وه چې د اسلامي دولت یا داعش پر وړاندې دغه ماموریت به پای ته ورسیږي.
دغه ماموریت د روان کال د اکتوبر په پای کې پای ته رسیږي، او په عادي حالاتو کې د یوه کال له پاره د پارلمان له لوري تمدیدیږي، خو دا ځل پارلمان بیا یوازې د شپږو میاشتو له پاره تمدید کړی دی.
آلمان اوسمهال په اردن کې د امریکا متحده ایالاتو په مشرتوب د داعش ډلې پر وړاندې د مبارزې په نړیوال ائتلاف کې څلور جټ جنګي الوتکې، یوه ستره رادار لرونکې الوتکه او بله داسې الوتکه لري چې په هوا کې نورو الوتکو ته تيل ورکوي.
په ورته وخت کې د آلمان پارلمان په عراق کې بیا خپل پوځي ماموریت د یوه کال له پاره تمدید کړی دی.
د داعش پر وړاندې د آلمان د پوځي ماموریت د پای پریکړه داسې مهال کیږي چې د دې هیواد د دفاع وزیرې انیګریت کرمپ کارنباور د سوریې په شمال کې د یوې داسې خوندي حوزې وړاندیز کړی دی چې پکې نړیوال پوځیان میشت وي.
امریکا متحده ایالاتو بیا آلمان هڅولی څو د داعش پر وړاندي مبارزې په برخه کې په نړیوال ائتلاف کې خپل حضور ته ادامه ورکړي.