الکول: د انسان بدن ته زهر دي
۱۴۰۱ شهریور ۲۹, سهشنبه
د چرسو په اړه نظرونه سره ويشلي دي. د قانوني کولو په اړه یې هم نظرونه مختلف دي. خو مهمه او په بشپړه توګه مناسبه پوښتنه دا ده چې دغه نشه یي توکی څومره خطرناک دی؟
د الکولو په اړه بيا اختلاف نشته. انسانان یې په محفلونو کې د ملګرو او همکارانو سره د تودو بحثونو پر وخت څښي. خو دا چې الکول څومره خطرناک دي، دا پوښته په دې ډول غونډو کې نه مطرح کیږي.
انسانان د خوښيو د لمانځلو، ځان د آرامولو او استراحت په موخه سره راټوليږي او ځيني وخت په داسې حال کې چې خپله دغه معتاد کوونکی مشروب کاروي چې د انسان د بدن له پاره زهر دي، د نورو نشه يي موادو د خطرونو په اړه غږيږي.
حتی لږ اندازه الکول هم زيان لري
کرستينا رومل وايي: «الکول cytotoxin دي.» ساېتوتوکسين هغه مواد دي چې د بدن حجرات په بيلا بيل ډول زیانموي. دا ټولنپوهه د آلمان د اعتياد د مسايلو د مرکزي دفتر مشره ده. د نوموړې په حواله په اصل کې د الکولو هر يو ګوټ د بدن له پاره ناوړه پايلې لري.
د الکولو د استعمال له پاره د محدوديت يوه انداره ټاکل شوې ده، چې په آلمان کې ترې په منظم ډول پښه اړول کيږي.
څیړنه: د الکولو څښل په هره اندایزه چې وي، ضرر لري
رومل وایي: «دغه حد په ورځ کې د ښځو له پاره ۱۲ ګرامه او د نارينه وو له پاره ۲۴ ګرامه دی.» دا توپير د دواړو جنسيتونو په بدن کې د اوبو د مختلف تناسب پايله ده. د ښځو په بدن کې د اوبو حجم لږ وي څو پکې الکول وويشل شي. په اصل کې ۲۴ ګرامه الکول هم ډېر نه دي. دا د شرابو يو ګيلاس کیږي. خو د کرستينا رومل په حواله تر دويم ګيلاس وروسته بيا خطر زياتيږي.
د «آلمان د الکولو تازه اطلس» څرګندوي چې د الکولو ډېر او په منظم ډول استعمال، څومره خطرناک دی. دغه مشروب د تر ۲۰۰ ډېرو ناروغيو په رامنځته کيدو کې دخيل دی. په دې کې د سرطان بېلا بېل ډولونه، د زړه او وینې جريان ناروغۍ، د شکرې دويم ډول او د اينې (ينه) ناروغۍ شاملې دي. د اينې ناروغي د رامنځته کيدو له پاره خو يوازې د الکولو مصرف مسئول بلل کیږي.
د آلمان د اعتياد د مسايلو د مرکزي دفتر په حواله په آلمان کې يوازې په کال کې ۶۲ زره کسان د الکولو د څښلو له کبله مړه کیږي.
کرستینا رومل پر دې خطرونو سربیره چې هر څښوونکي ته متوجې دي، د په اصطلاح «غېر فعال» څښوونکو ته یې شديد زيان هم په ګوته کوي. په دې کې د مثال په توګه د مېندوارۍ پر وخت د الکولو کارول شامل دي چې د مور په نس کې د ماشوم د بدن غړيو ته سخت زيان رسولی شي.
همدا راز بيا د کوچنيانو له پاره په الکولو د روږدو مېندو او پلرونو سره ژوند هم يوه سخته تجربه ده چې د نشې په حالت کې په کورنۍ کې د فزيکي تاوتريخوالي خطر هم لوړوي.
همدا راز دا اقتصادي اړخ هم لري ځکه د الکولو نشه د ډېرو پېسو د مصرف سبب هم ګرځي. رومل په دې اړه وايي: «مستقيم او غير مستقيم مصارف په کال کې کابو ۵۷ ميليارده يورو دي.» د نوموړې په خبره هغه پېسې چې موږ ټول یې ورکوو.
الکول؛ په نورو نشه يي توکو د روږدي کیدو دروازه
دا چې الکول د يوه انسان له پاره څومره خطرناک دي، بېلا بېل فاکتورونه لري. نه يوازې جنسيت پکې رول لري، بلکې د انسان وزن، د خوړو ډول او يا د درملو کارول هم کيدای شي د الکولو ويجاړونکی اغیز نور هم چټک کړي.
د سيګريتو هغه کاروونکي چې وزنونه یې ډېر وي او نورې ناروغۍ هم ولري، چې په ډېرو مواردو کې همداسې وي – ډېر زيات زيانمنيږي. پر دې سربيره سن هم پريکړنده دی: څومره په کم سنۍ کې چې يو بېر څښل شوی وي، هومره یې د اوږده مهاله زيان خطر هم ډېر وي او همدا راز د معتاد کیدو خطر يې لوړ وي.
د کرستينا رومل په خبره له همدې کبله د تنکيو ځوانانو پوهاوی ډېر مهم دی. خو د هغې په خبره ډېر لویان یې هم د خطرونه په اړه ډېر نه پوهیږي. نوموړې زياتوي: «الکول زموږ په ټولنه کې ډېرې ژورې رېښې لري.»
ب. ص/ ن. ز (Julia Vergin)
زموږ له آرشيف څخه: