امريکا: په افغانستان کې دمګړۍ د ديپلوماتيک حضور پلان نه لرو
۱۴۰۲ بهمن ۱۷, سهشنبه
د امريکا متحده ایالاتو د بهرنيو چارو وزارت د وياند مرستيال ودانت پاتېل، د دوشنبې په ورځ د يوه خبري کنفرانس په ترڅ کې وويل: «ډېره مهمه ده چې د بهرنيو چارو وزارت دريځ په بشپړه توګه روښانه کړو او هغه دا دی چې موږ په کابل کې د کوم ديپلوماتيک فعاليت د بيرته پیلولو له پاره هيڅ ډول لنډ مهاله برنامه نه لرو.»
خو طالبانو په څو ځلې ټينګار کړی دی چې د نړۍ هېوادونه دې د افغانستان په کورنيو چارو کې له لاس وهنې پرته له افغانستان سره خپلې دیپلوماتيکې اړيکې بيرته پېل کړي.
په افغانستان کې د امريکا متحده ايالاتو ديپلوماتيک حضور له دغه هېواد څخه د ۲۰۲۱م کال په اګست میاشت کې د امريکايي ځواکونو تر وتلو او واک ته د طالبانو تر رسېدو راهېسې متوقف شوی او په افغانستان کې د دغه هېواد سفارت فعال نه دی.
پاتېل وويل چې له طالبانو سره هر ډول ښکېلتيا د طالبانو د ادارې له خوا د بشري حقونو په درناوي پورې تړلې ده.
هغه وويل: «موږ د طالبانو په ګډون له ډېرو افغانانو سره تعامل لرو، هم په داخل او هم له هېواد څخه دباندې، خو بشري حقونه او ښوونځيو ته د نجونو او ښځو بيرته ستنېدل زموږ د تعامل اصلي لومړيتوب دی.»
پاتېل يادونه وکړه چې متحده ايالات به د ملګرو ملتونو او خپلو کليدي شريکانو سره په ګډه پر طالبانو فشار ته دوام ورکړي څو تبعيضي فرمانونه، په ځانګړي توګه د ښځو او نجونو پر وړاندې، لغوه کړي.
نوموړي ټینګار وکړ چې د اړيکو عادي کولو چاره «د ټولو افغانانو حقونو ته په احترام پورې تړلې ده.»
سره له دې چې د طالبانو د واکمنۍ دوه کاله تير شوي دي، د دې ډلې حکومت تر اوسه د نړۍ يوه هېواد هم په رسمیت نه دی پيژندلی. دا په داسې حال کې ده چې چين په دې وروستيو کې د طالبانو د سفير باورليک منلی دی او داسې رپوټونه هم شته چې چين په خاموشۍ په افغانستان کې خپل نفوذ پراخوي.
ب. ص/ ن. ز (حسين سيرت)