انځورونه: په خیبر پښتونخوا کې د گوړي تولید

د خیبر پښتونخوا ایالت په ډیرو سیمو کې د گني له اوبو څخه په وړو گاڼیو کې د گوړي جوړولو چاري له دسمبر میاشتي پیلیږي. خو د بزگرانو او پوهانو په وینا په جنورۍ، فبرورۍ او مارچ میاشتو کې د جوړي شوي گوړي معيار ښه بلل کیږي.

د گوړي جوړولو په لومړۍ مرحله کې په ماشن سره له گني څخه اوبه ایستل کیږي. پخوا به دغه ماشینونه د غوایانو په واسطه تاویدل اوس دغه کار برق کوي.

په دوهم پړاو کې له تب څخه د گني شربت په یوه لوی کړایي کې اچول کیږي، چیرې لاندې تر اور بل وي. دغه مهال شربت لړل کیږي او غیر ضروري مواد تر لیري کیږي.

له گني د اوبو ایستلو وروسته د هغه پوستکي په لمر سره وچيږي. بیا له دغو پوستکو څخه د گوړي جوړولو پر مهال د سونگ توکو په توگه گټه کار اخيستل کیږي. زیاتره مهال د باران او یا ناسمې هوا له کبلې يې د اوچیدو چاري اغیزمني کیږي، چې له کبله یې د گوړي د تولید چاري هم ځنډنۍ کیږي.

د شربت تر پخیدو وروسته هغه د لرگي څڅه په جوړ شوي خاص لوښي کې اچول کیږي، چې د سړېدو چاري يې پیلیږي. دغه مهال ایشیدلي شربت په دوامداره توگه لړل کیږي، څو ځان ونیسي.

په دې مرحله کې د گاڼۍ ټوله عمله برخه اخلي. د یوه تجربه لرونکي مشر یا بزگر تر مشورې او یوه ځانگړي وخت وروسته گوړه یو اړخ ته ټولیږي.

گوړه په همدغه ستر لرگین لوښي کې راټولیږي، په دغه مرحله کې د گوړي د ټوټې اندازه ټاکل کیږي. د گوړي د ټوټو د جوړولو پر مهال په هغه کې ځني وختونه وچه میوه لکه، بادام، غوز او داسي نور شیان اچول کیږي چې په محلي اصطلاح ورته «مصاله داره» گوړه هم ویل کیږي.

د گوړي تر جوړیدو وروسته هغه منډیانو یا سترو مارکیټونو ته وړل کيږي، چې له هغه ځايه بیا د پاکستان پر بازارونو سربیره افغانستان، منځني ختیځ او مرکزي آسیا هیوادونو ته هم استول کیږي.

په ټول پاکستان کې چیري چې د پخوانې دود له مخې په گاڼیو کې د گوړي د جوړیدو چاري ادامه لري او زیاتره وخت بزگران پر همدې تکیه کوي نو له بل اړخه ځیني بزگران د گني تر حاصل وروسته هغه د بورو پر فابریکو باندي پلوري چې په وینا یې ژر نغد عاید تر لاسه کوي.