ترمپ د ۲۰۲۰م کال ټاکنو له پاره کمپاين پېل کړ

دونالد ترمپ خپله دا وينا په داسې حال کې کوله چې هلته يو شمير ژورنالستان هم موجود وو. پر رسنيو سربيره نوموړي پر خپلو سياسي مخالفينو يعني ديموکراتانو چې غواړي نوموړی د ۲۰۲۰م  په ولسمشریزو ټاکنو کې له سپېنې ماڼۍ وشړي، هم لفظي بريدونه وکړل. ترمپ وويل چې ديموکراتان د نفرت چلن کوي او غواړي «زموږ هېواد چې موږ یې څرنگه پيژنو، ويجاړ کړي. »

ټول حسود دي

ولسمشر خپل اقتصادي سياست ډېر بريالي وباله او وېې ويل چې اقتصاد ډېر غوړېدلی دی. هغه وويل: «ټوله نړۍ زموږ له اقتصاد څخه حسوده ده. دا ښايي زموږ د هېواد په تاريخ کې تر ټولو ښه اقتصاد وي.»

ترمپ په فلوريدا کې تر دې سترې غونډې د مخه د تويتر له لارې ويلي ول چې د جمهوري غوښتونکو خوشبينې خپل «اوج» ته رسېږي.  په يوه بل تويت کې هغه يو وار بیا خپل پخوانی انتخاباتي شعار «امريکا به يو ځل بيا عظېمه کړو.» تکرار کړ خو نوموړی د «امريکا عظيمه وساتئ» له شعار سره کمپاین کوي.

په رښتيا هم د نوموړي ډېر پلويان د هغه د ټاکنیز کمپاين له پېل څخه ډېر خوښ دي. په غونډه کې موجود يوه تن وويل: «موږ له ترمپ څخه ملاتړ کوو ځکه هغه خپلې ټولې ژمنې پوره کړي دي.»

د غونډې نورو ډېرو گډونوالو هم ټينگار وکړ چې ترمپ د اقتصاد له پاره ډېر څه کړي. د نوموړي يوې پلوۍ د بې کارانو ټيټ شمير ته په اشارې سره وويل: «ترمپ له هغو ټولو ولسمشرانو څخه ښه دی چې موږ تر اوسه لرلي دي.»

د جمهوري غوښتونکو په منځ کې له ترمپ سره د مقابلې کانديد؟

له ترمپ سره د مقابلې له پاره تر ۲۰ زياتو ديموکراتانو په گوند کې دننه د نومانديدو له پاره سيالۍ کې گډون کوي. خو په جمهوري غوښتونکو کې تر اوسه پر ترمپ سربيره يوازې يوه بل کانديد د ۲۰۲۰ م کال د نومبر په ولسمشریزو ټاکنو کې د گوند د استازيتوب پريکړه کړې ده. دا د ماسيچوست ايالت پخوانی گورنر بل ويلد، دی. خو ويل کيږي چې هغه د پام وړ چانس نه لري چې ترمپ ته د جمهوري غوښتونکو د گوند د کانديد په توګه د لارې خنډ وگرځي.

دا چې ترمپ د انتخاباتي مبارزې پېل له فلوريدا کوي، کوم تصادف نه دی. د جنوب دغه ایالت په ټاکنو کې د بريا کلي بلل کيږی: د ۲۹ استازو په لرلو سره د نيويارک سره په شريکه تر تکساس او کاليفورنيا وروسته دريم مهم ايالت دی او همدا راز له هغو ایالتونو څخه يو دی چې سړی له لومړي سره نه پوهيږي چې ديموکراتان او که جمهوري غوښتونکي به پکښې بريالي کيږي.

bs/ms (dpa, afp, rtr)

زموږ له آرشيف څخه: