جرمني د مهاجرو له پاره لس ميلیارده یورو اضافه مصرفوي
۱۳۹۵ فروردین ۴, چهارشنبه
داخبره «پساور نوین پریسه» ورځپاڼي د خپلي چهارشنبه په گڼه کي د حکومتي منابعو په حواله کړې ده چي د ۲۰۱۷م کال له پاره د بوديجې د تصویبولو پروخت به دکابینې د نن ورځي په جلسه کي ورباندي بحث وسي.
دغه پیسې به د مهاجرو له پاره د ژبي او مدغمیدو پر کورسونو، د مهاجرو مرکزي ادارې،فدرالي پولیسو او تیښتي له عواملو سره د مبارزې په لار کي ولگول سي.
د کورونو جوړولو له پاره هم حکومت ۸۰۰ ميلیونه یورو اضافه پلان کړي دي او۱،۱ ميلیارد نوري د کارپیداکولو، ادغام او تقاعد له پاره او همدارنگه ۴۵۰ ميلیونه د فامیلي-سیاسي تدابیرو له پاره په نظر کي نیول سوي دي.
دمالیې وزیر ولفگنگ شویبله د راتلونکي کال له پاره مجموعأ ۳۲۵،۵ ميلیارده یورو بوديجه پلان کړې ده چي تر۲۰۱۶ م کال ۲،۷ فیصده ډیره ده.
په همدې حال کي حکومتي ائتلافي گوند، سوسيال ديموکراتان غواړي چي مرکزي حکومت د منل سوو پناه غوښتونکو د سرپناوو مصارف او کرایې په مصارفو کي ډیره برخه واخلي.
په اوس وخت کي مرکزي حکومت ایالتونو او ناحیو ته د هر مهاجر پر سر د ټولو مصارفو له پاره ۶۷۰ یورو ورکوي. خو دغه پیسې د هغوی د پناه غوښتوني پروسې تر ختمولو پوري ورکول کیږي.
کله چي څوک قبول سي، ایالتي او محلي اجتماعي مرکزونو ته ورځي او د کار پیداکولو تر وخته پوري یې هغوی مصارف پر غاړه اخلي.
د دې تر څنگ باید ورته د سرپناوو مصارف او کرایې هم ورکړي. خو ایالتونه او ښارونه وايي، چي د مهاجرو په ډیر راتگ سره پر دوی فشار ډیر سوی دی او مرکزي حکومت باید تر ټولو دمخه د هغوی له پاره د کورونو په کرایو کي ډیره ونډه واخلي.