حماس غواړي اسرائيل سره د اوربند له پاره خبرو ته دوام ورکړي

حماس په دې هکله په یوه اعلامیه کې ويلي دي: «موږ د خپلو خلکو پر وړاندې د یو هر اړخيز تهاجم د توقف له پاره د لازم نرمښت ښودلو په حال کې یو.» د حماس په اعلامیه کې زیاته شوې چې د دوی په خبره «اشغالګر» لا هم دغه توافق ته د رسېدلو له پاره شاتګ کوي.

دا وخت په قاهره کې د حماس، قطر او مصر له لوري، د اسرائيل له حضور پرته روان مذاکرات په دې هڅه کې دي تر څو په ورژې میاشت کې چې راتلونکې اونۍ پيلیږي، د حماس او اسرائيل تر منځ یو ۴۰ ورځني اوربند رامنځ ته کړي.

د امریکا متحده ایالاتو ولسمشر جو باېدن د سه شنبې په ورځ وویل چې دا د حماس په اختیار کې ده چې آیا په غزې تړانګه کې د اوربند له پاره پر مېز ايښی توافق د یرغملانو په تبادلې سره مني او که نه. هغه دغه خبره په داسې حال کې کړې چې د پلاو په درې ورځنیو مذاکراتو کې د پرمختګ کوم څرک ترسترګو شوی نه دی.

حماس ته وړاندې شوې معامله کولی شي یو شمېر یرغملان آزاد کړي کوم چې فلسطیني یاغیانو د اکتوبر پر ۷مه پر اسرائيل د تروريستي حملې پر وخت نيولي او له کبله ېې جګړې ته لمن ووهل شوه. د توافق په صورت کې به غزې ته د قحطۍ د مخنيوي په موخه مرستې هم چټکې شي په داسې حال کې چې هلته روغتونونه په خوارځواکې د اخته ماشومانو درملنه کوي. له بل لوري به حماس هم د ټولو یرغمل شوو کسانو چې په غزه کې ساتل کېږي، نوملړ چمتو کړي.

د امریکا متحده ایالاتو د ولسمشر جو بایدن مرستيالې، کاملا هېریس پر اسرائيل غږ کړی دی چې په غزه کې د «انساني فاجعې» د ډېرېدو د مخنيوي له پاره لا ډېر اقدامات وکړي.

امریکا متحده ایالات غزې ته چېرته چې د غزې د روغتيايي چارواکو د معلوماتو له مخي په روانه جګړه کې تر ۳۰زرو ډېر کسان وژل شوي، د بشري مرستو پر رسولو ټینګار کوي. په دې هکله ولسمشر بایدن ویلي دي: «موږ باید غزې ته لاډېرې مرستې ورسوو.»

د امریکا متحده ایالاتو د ملی امنیت سلاکار جک سلوان او د قطر لومړي وزير شیخ محمد بن عبدالرحمن الثاني د سه شنبې په ورځ په سپينه ماڼۍ کې جوړه شوې یوه غونډه کې ټينګار وکړ چې د ناروغو، ټپيانو، ښځو او د ډېر عمر لرونکو یرغملانو آزادول کېدای شي لږ تر لږه په شپږ اونيزه فوري اوربند باندې منتج شي.

د سپېنې ماڼۍ په اعلاميه کې راغلي دي چې «د اوربند له دغه لومړی پړاو سره به همدارنګه د غزې له خلکو سره د بشري مرستو لړۍ هم چټکه شي» او همدارنګه به د آرامښت او چمتووالي له پاره لا ډېر د وخت او ځای امکانات برابر کړي.

حماس وايي، غواړي له منځګړو هېوادونو سره داسې مذاکراتو ته ادامه ورکړي چې په نتيجه کې ېې په غزه کې جګړه پای او داسې یو توافق ته لار هواره کړې چې په خبره ېې «د فلسطینیانو غوښتنې او منافع» تر پوښښ لاندې ونیسي.

په حاضر وخت کې له امریکا، قطر او مصر څخه مذاکره کوونکي د مصر په پلازمینه قاهره کې په دې هڅه کي دي تر څو د مارچ پر لسمه د روژې میاشتې له پیل څخه دمخه د حماس او اسرائيل تر منځ یو موقت اوربند ته لاسرسی پيدا کړي.

حماس په یوه اعلاميه کې ويلي دي چې دوی داسې یو توافق ته چې په وینا ېې د اسرائيل د «یرغل توقف» پکې وي، «لازم انعطاف» ښودلو په حال کې دي.

اسرائيل تر اوسه د حماس له خوا د ېو پراخ اوربند درخواست رد کړی دی او لا هم د دغې ډلې د لمنځه وړلو له پاره خپل هدف پر مخ وړي. دغه هېواد ېوازې په غزه کې د یو موقت اوربند له پاره حاضر دی.

حماس همدارنګه پر اسرائيل تور لګوي چې د دایمي اوربند له منلو، له غزې تړانګې شاتګ او د دغې سېمې اوسیدونکو د تجهیزاتو له تامینولو ډډه کوي. دواړه خواوې يو له بل سره مخامخ مذاکرات نه کوي، بلکې خپل مذاکرات په منځګړيتوب مخ ته وړي.

د غزې روان جنګ د ۲۰۲۳م کال د اکتوبر میاشتې پر ۷مه هغه وخت پیل شو چې حماس ډلې پر اسرائيل حمله وکړه. حماس په دغه حمله کې چې دغه ډله ورته د «طوفان الاقصی» نوم ورکوي، شاوخوا ۱۲۰۰کسان ووژل او تر ۲۵۰ ډېر نور ېې له ځان سره غزې تراډي ته وتښتول.

له بل لوري د ترکیې ولسمشر، رجب طیب اردوغان، اسرائيل ته خبرداری ورکړی دی چې په روژې میاشت کې دې د فلسطین مسلمانانو مسجد الاقصی او په بیت المقدس کې د سپيڅلې ځایونو د ورتلو مخه نه نیسي.

د حماس وسله واله ډله پر نورو هېوادونو سربیره د امريکا متحده ايالاتو، آلمان، اسرائيل او اروپايي ټولنې له خوا د تروريستي سازمان په توګه درجه بندي شوې ده.

له آرشیف څخه: