د اتومي انرژۍ په برخه کي د هند او امریکا موافقه
۱۳۹۳ بهمن ۶, دوشنبه
د امريکا متحدو ايالاتو جمهور رئيس بارک اوباما او د هند صدراعظم نارندرا مودي، په نوي دهلي کي د ليدني کتني پرمهال له اتومي انرژۍ څخه د سوله ييزه کار اخيستلو په برخه کي د دواړو هيوادونو د ژورو همکاريو پر سر موافقې ته سره رسېدلي دي.
دغه موافقه چي د يکشنبې په ورځ (۲۰۱۵م کال د جنورۍ ۲۵مه) د دواړو هيوادونو د مشرانو ترمنځ لاسلیک سوه، پر دغي موضوع باندي له کلونو راهيسي حاکم منجميد حالت يې ختم کړ.
اوباما به د سه شنبې تر ورځي پوري په هند کي پاته سي. دا د هغه د جمهوري رياست په دوران کي دوهم سفر دئ، چي هند ته ئې کوي. اوباما د امریکا لومړی جمهور رئيس دئ، چي هند ته دوه واري سفر کوي.
اوباما د دغه موافقتنامې لاسليکول ستر «بری» او د دوو اړخيزو همکاريو په برخه کي يو مهم «گام» بللی دئ.
هند او امريکا په ۲۰۰۸م کال کي داسي يو تړون لاسليک کړی وو، چي هند ته د سوله ييزو هدفونو له پاره اتومي انرژي په اختيار کي ورکړل سي.
له اقليمي بدلونو سره مقابله
د هند او امريکا د مشرانو په ملاقات کي د چاپيريال ساتني او اقليمي بدلونونو پر موضوعگانو باندي هم خبري وسوې.
د گلخانيي گازو د کمښت په برخه کي هم د دواړو هيوادونو ترمنځ موافقه لاسليک سوې ده. پر دغي موضوع باندي به د اقليمي بدلونونو په اړه جوړېدونکي کنفرانس کي چي په پاريس کي رابلل کيږي، بحث وسي. کنفرانس د روان کال په وروستيو کي رابلل کيږي.
هند د گلخانيي گازو د توليد په برخه کي په نړۍ کي يو له سترو هيوادونو څخه دی چې دغه شان گاز توليدوي.
د امریکا جمهور رئيس بارک اوباما له خپلي ماينې ميشل اوباما سره د دوشنبې په ورځ د هند د جمهوريت د ورځي په مراسيمو کي گډون وکړ. دا لومړی وار وو، چي د امريکا يو جمهور رئيس په دغو مراسيمو کي د گډون اجازه موندلې ده.