د فابریکې مالک پر توپونو د قرآني آيت د ليکلو په تور نیول شوی
۱۳۹۹ اردیبهشت ۱۴, یکشنبه
د آلمان خبري آژانس له اسلام آباد څخه د خپرو شوو رپوټونو په حواله ليکي چې دغه کس د پاکستان پنجاب صوبې د سيالکوټ ښار چارواکو، «مذهب ته د سپکاوي» په تور توقیف کړی دی.
په اړه یې ويل شوي دي چې د هغه په فابريکه کې جوړو شوو د فوټبال پر توپونو باندې د اسلام د پيغمبر او د قراني آيتونو انځورونه ليدل شوي دي.
د تحقيقاتو د ادارې يوه افسر، اصغر علي د شنبې په ورځ د آلمان خبري آژانس ته ويلي وو چې تورن په توقیف کې دی او د پاکستان د ديني علماو له بورډ څخه غوښتنه شوې چې دغه قضيه وڅيړي.
د پاکستان سيالکوټ ښار د ډيرو صنعتي کارخانو پر درلودلو مشهور دی. د پنجاب په دغه شمالي ښار کې د فوټبال، کرکيټ او نورو سپورټي لوبو وسايل په ډير لوړ کيفيت جوړيږي چې په نړۍ کې هم شهرت لري. د ۲۰۱۸م کال د فيفا نړيوال جام له پاره د فوټبال توپ هم د پاکستان په سيالکوټ کې جوړ شوی وو.
د کرونا ويروس او د دغې وبا له امله د لګول شوو بنديزونو سربيره، د جمعې په ورځ په سيالکوټ کې د مذهبي ادارو له خوا اعتراضونه ترسره شول. د اصغرعلي په خبره چې د تورن کس تر نيول کيدو وروسته، دغه اعتراضي مظاهرې درول شوي دي.
په پاکستان کې مذهب ته د توهین له پاره درنه سزا ټاکل شوې ده. د تورنو افرادو پر ضد اکثره دغه ډول قضيې، سخت دريځو ډلو راپارولي دي. په ځينو پيښو کې حتی دا ډول تورن کسان وژل شوي هم دي.
په کال ۲۰۱۱م کې د پاکستان د پنجاب صوبې پخوانی والي، سلمان تاثير چې مذهب ته پر سپکاوي باندې تورن وو، د خپل ساتونکي ممتاز قادري له خوا په ډزو ووژل شو.