د لیبیا د ملي پوځ مشر ترکیه خپل دښمن بللی
۱۳۹۸ تیر ۹, یکشنبه
په لیبیا کې له څو کلونو راهیسې د قدرت پر سر روانه جګړه او په دغه هیواد کې د پرله پسې نا امنیو په برخه کې ياغي جنرال خلیفه حفتر ته د کورنۍ جګړې د یوه مرکزي لوري په سترګه کتل کیږي.
د هغه وسله وال ملیشه چې د «لیبیا ملي پوځ» LNA یي بولي له نظامي پلوه ډیره پیاوړې ده. حفتر تور لګولی دی چې ترکیه په لیبیا کې د هغه د مخالفينو سیاسي ملاتړ کوي. جنرال حفتر د دې له پاره چې د انقرې حکومت خپل سیاسي موقف بدلولو ته اړ باسي خپل دریځ سخت کړی دی.
د ټولو ترکیي اتباعو د نيولو حکم
د خلیفه حفتر د پوځ ویاند احمد المسماري په حواله د دوی مشر امر کړی دی چې د لیبیا په سمندري حدودو کې دې ټولې ترکي کښتۍ په نخښه شي. سربیره پر دې دي د ترکیي هیڅ بیړۍ ته د لیبیا په سمندري حدودو کې د داخلیدو اجازه ور نه کړای شي او د دواړو هیوادونو ترمنځ دي ټولې هوایې اړیکې قطع کړای شي.
د المسماري په خبره دا پریکړه د دواړو هیوادونو ترمنځ د سوداګریزو پروازونو په برخه کې هم صدق کوي.
ویاند زیاته کړې ده چې اوس د ترکيې ټولې سمندري کښتۍ او الوتکې به د دغه ملیشه ځواک له پاره داسې اهداف وي، چې د دښمن په توګه به په نخښه کیږي.
سربیره پر دې په لیبیا کې هر ډول ترکي تاسیسات او ادارې د حفتر د ځواکونو دښمن وګنل شي. زیاته شوې ده چې په اوس وخت کې چې په لیبیا کې په هره اندازه ترکیي اتباع موجود دي هغوې به هم ونيول شي.
د لیبیا شخړه شاید نور هم شدت ومومي
د مختلفو خبري سرچينو په حواله د شمالي افریقا په دې جګړه ځپلې هیواد کې د حفتر دغه نوې پریکړه به د لا زیاتې وینې تویدنې او د جګړې لمن د پراخیدو سبب شي.
د دې یو دلیل دا دی چې ترکیه د هغو ډیرو لویدیځو هیوادونو، ناټو او ملګرو ملتونو سازمان د غړو هیوادونو له ډلې څخه ده چې په لیبیا کې په نړیواله کچه د په رسمیت پيژندل شوي لومړي وزیر السراج د حکومت ملاتړ کوي.
د لیبیا د ملي پوځ ویاند د خلیفه حفتر په حواله تور لګولی دی چې ترکیه «د لیبیا په داخلي چارو کې بی شرمانه مداخله» کوي.
جنرال خلیفه حفتر د لیبیا د پخواني دیکتاتور معمر القذافي د واکمنۍ پر مهال د پوځ یو لوړپوړی افسر وو چې اوس یي وسله واله ملیشه د لیبیا د ختیځ ډیرې سیمې تر خپل کنترول لاندې لري.
آژانسونه/ ش.ن/ ن.ز