د نړۍ تر ټولو لوی مهاجر کمپ له ګواښ سره مخامخ دی

د دداب په نوم دغه کمپ په ۱۹۹۱ کال کي جوړ کړل سو. د هغه راهيسي د دغه مهاجر کمپ زياتره اوسېدونکي د سوماليا هغه مهاجر دي چي په خپل هيواد کي د دوامداره تاوتريخوالي څخه تښتېدلي دي. په دغه مهاجر کمپ کي داسي مهاجر هم سته چي تر ۲۰ کالو څخه زيات وخت کيږي دلته ژوند کوي.

د کينيا حکومت غواړي چي د مهاجرو دغه لوی کمپ وتړي ولي چي حکومت دغه مهاجر کمپ ته د خپل هيواد له پاره د ګواښ په سترګه ګوري. د کينيا حکومت وايي چي په دغه هيواد کي وروستي تر سره سوي بريدونه په همدغه مهاجر کمپ کي پلان سوي ول.

د دغه مهاجر کمپ د تړلو رسمي هدايات او امر په ۲۰۱۶ کال لا سوی ؤ. د دغه امر له مخي د کمپ اوسېدونکي تقريبا ۲ مليونه او ۶۰ زره ټول مهاجر بايد سوماليا ته ولېږدول سي.

په لومړي سر کي د دغه کمپ د تړلو له پاره د ۲۰۱۶ کال د نوامبر مياشته مهالوېش ټاکل سوی ؤ. خو د دغه پرېکړي پر ضد د مخالفتونو له کبله او د کينيا سترې محکمې د پرېکړي وروسته دغه مهالوېش د ۲۰۱۷ کال تر می مياشتي پوري وغځول سو. په دې توګه د کينيا د حکومت پلان د خنډونو سره مخامخ سو.

اړونده محکمې په خپله فيصله کي د حکومت له لوري د دغه لوی شمېر مهاجرو د ايستلو حکم ته د انسانانو د شکنجې سره تشبيه ورکړې وه. خو د کينيا حکومت وايي چي دغه موضوع د دغه هيواد د امنيت سره تړلې ده.

په کينيا کي د بشري حقونو کميسیون او يو شمېر نورو د بشري حقونو سازمانونو د کينيا د حکومت دغه پرېکړه تر پوښتنې لاندي راوستلې وه. دغه سازمانونه وايي چي د حکومت دغ پلان د نړيوالو قوانينو پرضد او له تبعيضه ډکه ده.

کينيا په ۲۰۱۱ کال د سوماليا د الشباب ډلې پر ضد پوځي عمليات پېل کړل. د هغه راهيسي په کينيا کي ترهګر بريدونه زیات سوي دي.

د کينيا حکومت وايي چي په ۲۰۱۳ کال او په ۲۰۱۵ کال په پلازمېنه نيروبي کي تر سره سوي ترهګر بريدونه د دداب په مهاجر کمپ کي پلان سوي ول. خو حکومت خپلې دغه ادعا له پاره ثبتوتونه نه دي وړاندي کړي.

سوماليا د لسيزو راهيسي د تاوتريخوالي سره لاس او ګرېوان هيواد دی. که څه چي له ۲۰۱۲ کال راهيسي د نړيوالو په مرسته د نوي حکومت د پر واک راتلو راهيسي وضعه تر پخوا بهتره سوې ده، خو دغه هيواد اوس هم د الشباب مليشو د ستونزي سره مخامخ دی.