د نړۍ مهم او لنډ خبرونه له متن او انځور سره

په سوریه کې د خوندي سیمو د رامنځته کولو پر سر تر توافق وروسته، د بشار الاسد او د یاغيانو ترمنځ بیا نښتې شوي دي. د سوریې د بشري حقونو د څار ډلې خبر ورکړی چې جنګي جت الوتکو د حما په ولایت کې ځینې سیمې بمبار کړي دي. د یاغیانو یوه ویاند هم دغه نښتې تایید کړي دي خو د سوریې دولتې سرچینو په دې هکله تر اوسه څه نه دي ویلي. دغه توافق د ترکیې، ایران او روسیې ترمنځ د قزاقستان په مرکز آستانا کې شوی وو.

د فرانسې د دوهم پړاو ولسمشریزو ټاکنو لږ څه مخکې، د دې هیواد په ولسمشریزو ټاکنو کې د خپلواک نوماند امانویل ماکرون د انتخاباتي مبارزو پر ډلې باندې هکري انټرنټي برید شوی. د هغه ټیم ویلي دي چې د دې انټرنیټي برید هدف د ماکرون بې اعتباره کول دي. د فرانسې د کورنیو چارو وزارت په دې هکله څه نه وايي خو تر دې پیښې مخکې فرانسې د خپل هیواد په ولسمشریزو ټاکنو کې د روسیې د مداخلو په هکله خبردارۍ ورکړی وو.

په ترکیه کې تر ناکامې کودتا تقریباً ۱۰ میاشتې وروسته، یو ځل بیا ۱۰۷ وکیلان او څارنوالان له دندو ګوښه کړل شوي دي. د ترکیې دولتي خبري آژانس انادولو رپوټ ورکړی چې دغه کسان د ګولن پر ملاتړ تورن دي. د ترکیې حکومت، فتح الله ګولن چې اوسمهال په امریکا کې ژوند کوي، د تیرکال د کودتا اصلي عامل ګڼي. د ترکیې د ټولو ۱۴۰۰۰ وکیلانو له ډلې څخه تر اوسه پورې ۴۲۳۸ تنه وکیلان او څارنوالان له دندو ګوښه کړل شوي دي.

په ونزویلا کې د خلکو پر وړاندې د حکومت د چلند پر سر د نیوکو له امله، ۸۶ پوځي افسران نیول شوي دي. تر اوسه پورې د ونزویلا پوځ د دې هیواد سوسیالست ولسمشر ته وفاداره وو، خو د هغه اپوزیسیون بیا ولسمشر د روانو امنیتي او اقتصادي خرابو حالاتو مسول ګڼي. د ونزویلا د حکومت پرضد د مظاهرو تر پیل راهیسې د امنیتي ځواکونو او د مظاهره چیانو ترمنځ په نښتو کې ۳۸ کسان وژل شوي دي او له ۸۰۰ ډیر بیا ټپیان شوي دي.

د افریقايي هیواد چاد د پوځ یوه ویاند ویلي دي چې د دوی ۹ سرتیري او د بوکوحرام ډلې ۴۰ جنګیالي په نښتو کې وژل شوي دي. نښته د چاد د سیند په سیمه کې د نایجریا پولې ته څیرمه رامنځته شوې چېرته چې ملګري ملتونه داسې اټکل کوي چې په دې سیمه کې د اسلامپاله ترهګرې ډلې بوکوحرام له ویرې شاوخوا ۳ میلیونه کسان دې ته اړ شوي چې خپلې سیمې ترک کړي.