د نړۍ مهم خبرونه له متن او انځور سره

په افغانستان کې د سختې واورې اوریدو، بارانونو او واورې ښویدنې له کبله لږ تر لږه ۳۷ کسان وژل شوي دي. له همدې امله حکومت د یکشنبې ورځ عمومي رخصتي اعلان کړې. د افغانستان د طعبیي افاتو پر ضد د مبارزې ادارې ویاند عمر محمدي، د آلمان له خبري آژانس په مرکه کې ویلي چې د افغانستان په ۲۵ ولایتونو کې لږ تر لږه ۱۶ تنه نور کسان ټپیان شوي هم دي.

د ترکیې پولیسو د څو ځانګړو عملیاتو په ترڅ کې تقریباً ۴۰۰ تورن کسان د اسلامي دولت له ډلې یا داعش سره د اړیکې لرلو په تور نیولي دي. د ترکیې د انادلو رسمي خبري اژانس خبر ورکړی چې یوازې په انقره کې د داعش ډلې ۶۰ پلویان نیول شوي دي او زیاتره یې د ترکیې اتباع دي. د ترکیې حکومت په دې هیواد کې د ګڼ شمیر تروریستي بریدونو مسولیت د اسلامي دولت پر ډلې اچوي.

په آلمان کې د سوسیال مسیحي او دیموکرات مسیحي ګوند وروسته، اوس د سوسیال دیموکرات ګوند له مدیترانې بحیرې څخه د ژغورل شوو مهاجرینو بیرته شمالي افریقا ته د لیږد حمایت کړی. د آلمان په پارلمان کې د دې ګونو مشر، توماس اوپرمن د «فرانکفورته الګمانیه سایتونګ» ورځپاڼې ته ویلي دي چې د قاچاقبرو لخوا د انساني قاچاق د مخنیوي له پاره، باید دغه مهاجرین بیرته ولیږل شي او لومړی دې په شمالي افریقا کې ځای په ځای شي.

هغه بریدګر چې په فرانسې کې د چړې د برید کولو پروخت زخمي او بیا روغتون ته انتقال شوی وو، اوس رسماً د پولیسو تر نظارت لاندې دی. پلټونکو ویلي دي چې په روغتون کې له عملیات وروسته د هغه صحي حالت اوس د ښه کیدو په حال کې دی. چارواکي غواړي چې د امکان تر حده پورې له هغه څخه همدا نن د یکشنبې په ورځ تحقیقات وشي. نوموړي بریدګر د جمعې په ورځ په پاریس کې د الله اکبر په ویلو سره په څو تنو سرتیرو د چړې برید وکړ.

د کريکټ نړيوالې شورا افغانستان او ايرلنډ ته لاره هواره کړې څو د تېست لوبو ملتونه جوړ شي. د کريکټ نړيوالې شورا ويلي دي چې د بشپړو غړو هېوادونو تر منځ د مقرراتو او تمويل په برخه کې پر تغیراتو هوکړه شوې. د افغانستان د کرکټ بورډ په حواله ICC د افغانستان کورنيو څلور ورځنيو لوبو ته د لومړۍ درجې (فرسټ کلاس ) حيثت ورکړی او همدا راز د افغانستان شپږيزې ليګ ته هم د A کټګوري حیثیت ورکړل شوی دی.