د پلوتو نویو انځورونو ساینسپوهان حیران کړي

د ناسا ساینسپوهانو د چهارشنبې په ورځ اعلان وکړ چې د «نیو هوریزونز» سپوږمکۍ ډیر څه بربنډ کړي دي او د لومړي ځل له پاره یې له نزدې واټن څخه په لوړ کیفیت د پلوتو انځورونه اخیستي دي. دغه انځورونه د د دې سیارې له ۱۵۰ مایلي واټن څخه اخیستل شوي دي. ساینسپوهان ځکه ډیر حیران شوي دي چې له ځمکې څخه د دغې لیرې پرتې سړې سیارې سطحه د جیولوژیکي فعالیتونو نښاني لري.

د «نیو هوریزونز» له خوا استول شوي انځورونه لوي یخي غرونه ښيي چې د تر ټولو لوړ ارتفاع یې ۱۱۰۰۰ فوټ ته رسیږي.

جیولوژیکي معما

هغه څه چې ساینسپوهان یې حیران کړي دي چې د پلوتو په نسبې ټوګه تازه او پرته له ګوداله سطحه ده. پلوتو د کویپر کمربند په مجاورت، یعني له نیپتون څخه د لیریو تیږو او ستارو په سلسله کې قرار لري. له همدې کبله داسې اټکل کیده چې د پلوتو سطح دې له ګودالونو ډکه وي.

ساینسپوهان داسې فرض کوي چې د پلوتو سطح تازه شوې او تغیر یې کړی دی. هغوی تر سطحې لاندې د موجودو اقیانوسونو او نورو جیولوژیکي حرارتونو له کبله د یخ فشانونو د رامنځ ته کیدو خبره کوي.

د «نیو هوریزونز» سپوږمکې مسوولینو خبریالانو ته ویلي دي چې پلوتو ډیره متفاوته ده او تر اوسه پورې هغوی بل داسې کومه سیاره نه ده لیدلې.

اوس نو «نیو هوریزونز» خپل نهه نیم کلن درې میلیارده مایلي سفر پوره کړی دی او خپلو څیړنو ته به دوام ورکړي. هغه اوس د کویپر کمربند ته وردننه کیږي ترڅو د هغو توکو په اړه څیړنه وکړي چې د ساینسپوهانو په اند ۴.۶ میلیارده کاله مخکې د شمسي نظام د جوړیدو بقایا په کې موجودې دي.