د یونان ساحلي ګارد ۲۰۰ مهاجر نيولي دي
۱۳۹۸ اسفند ۲۶, دوشنبه
چارواکو ویلي دي چې قاچاقبران له یوې کوچنۍ ربړي کښتۍ څخه په استفادې تښتیدلي او دغه مهاجر یي یوازې پریښي دي. د یونان دولتي راډیو د ساحلي ساتونکو په حواله ویلي دي چې دغو پناه غوښتونکو د آژه سیند له لارې د ایټالیې په نیت حرکت کړی وو، خو په یونان کې بند پاتې شوي دي.
د رپوټ پر بنسټ دغه باري کښتۍ چې مهاجر په کې سپاره ول د تیزو بادونو له امله د کیا جزیرې په خټو کې نښتی ده. یونان د هغو مهاجرو د پناهندګۍ د غوښتنلیکونو ارزونه بنده کړې ده چې د مارچ میاشې له لومړۍ نیټې را په ديخوا له ترکیې څخه دغه هیواد ته ورغلي دي. ټاکل شوې ده دغه بندیدنه به د لومړي ځل له پاره د یوه میاشت له پاره دوام وکړي.
ټول هغه مهاجر چې د روانې میاشتې له لومړۍ نیتې را په دیخوا یونان ته رسیږي په یوه کمپ کې ساتل کیږي، څو وروسته یې بیرته ترکیې ته ستانه کړي.
د يونان حکومت هغه وخت پر دې اقدام لاس پورې کړ چې د ترکیې ولسمشر رجب طیب اردوغان د فبرورۍ میاشتې په پای کې اعلان وکړ چې له اروپایې اتحادیې سره خپلې پولې د مهاجرو پر مخ پرانیزي.
تر دې اعلان وروسته په زرګونو مهاجرو یونان ته مخه وکړه. د یونان امنیتي ځواکونه توانیدلي دي چې له اوښکي بهونکي ګاز او ربړي مرمیو څخه په استفادې اروپایې اتحادیي ته د دغو مهاجرو د راتګ مخه ونیسي.
مرستندویه سازمانونه د یونان پر دې اقدام نیوکه کوي، خو د اروپا د باندنیو سرحدونو د ساتنې آژانس (فرونټکس) بیا د یونان د امنیتي ځواکونو ملاتړ کوي.
آژانسونه: ش.ن/ب.ص