لنډ خبرونه په انخورونو کې

جاپان سویلي کوریا ته د دویمې نړیوالې جګړې پر مهال، اجباري فحشا ته د دې هیواد د ښځو د اړولو له کبله ۸،۷ میلیونه ډالر ورکوي. سویلي کوریا ویلي دي چې دغه پیسې به یوې موسسې ته ورکړل شي. دغه پیسې به د قربانیانو د کورنیو پر۴۰ پاتې شویو غړو ولګول شي. جاپان او سویلي کوریا د دې موضوع په اړه له کلونو راهیسې خبرې اترې کولې او په پای کې د تیر کال په دسمبر میاشت کې پرې فیصله وشوه.

د کندهار په سپین بولدک ولسوالۍ کې د افغانستان او پاکستان تر منځ لاره چې له دوو اوونیو راهیسې تړل شوې وه، بیا پرانیستل شوې ده. دا دروازه تر هغه وروسته وتړل شوه چې د اګست میاشتې پر ۱۸ نیټه د افغانستان د خپلواکي د لمانځنې پر مهال، د یو شمیر ځوانانو له خوا پاکستاني بیرغ ته اور واچول شو.

د اروپا د پارلمان مشر مارتین شولتس، په ترکیې کې تر ناکامې کودتا وروسته، د لومړي اروپايي لوړپوړې چارواکي په توګه دې هیواد ته سفر کړی دی. پلان شوې ده چې هغه د ترکیې له جمهور رییس رجب طیب اردوغان، سره وویني. دغه اروپايي چارواکی به همداراز د ترکیې له لومړي وزیر بنعلي یلدرم او د حکومت د مخالفانو له مشر کمال قلیچ اغلو سره هم وویني.

د امریکا متحده ایالاتو د جمهور ریاست په ټاکنو کې د جمهوري غوښتونکو نوماند دونالد ترمپ، ویلي دي چې که د دې هیواد ولسمشر وټاکل شي نو د مجرمو بهرنیانو پر ضد به ډیر شدید چلن وکړي. هغه زیاته کړې ده چې د ولسمشر په توګه له کار پیلولو څو ساعته وروسته به هغه مجرم بهرنیان له امریکا متحده ایالاتو څخه وباسي چې په دې هیواد کې په غیر قانوني توګه ژوند کوي.

د هسپانیا لومړي وزیر ماریانو رخوي، په پارلمان کې خپل د اعتماد رایه له لاسه ورکړې ده. هغه و نه توانید چې د راې اچونې په لومړي دور کې مطلق اکثریت ترلاسه کړي، او تر سختې مناظرې وروسته یې بیا هم شپږ رایې کمې وې. تمه کیږي چې د رای اچونې په دویم دور کې چې پلان شوې ده د جمعې په ورځ ترسره شي، رخوی یو ساده اکثریت ترلاسه کړي خو دا خبره هم ډیره یقیني نه ده.

د آلمان صدر اعظمې انګلا میرکل، د ایتالیا د زلزله ځپلو سیمو د بیا رغولو له بهیر سره د مرستو ژمنه کړې ده. میرکل د آلمان او ایټالیا د حکومتونو تر مشورتي غونډې وروسته په مارا نیلو، سیمه کې د یوه ښوونځي جوړولو اعلان وکړ. د ایتالیا د تیرې اوونۍ په زلزله کې له ۲۹۰ تنو څخه ډیر کسان ووژل شول. پر دې سربیره میرکل له ایتالیا سره د کډوالو په برخه کې د مرستې او ملاتړ ژمنې هم وکړې.