له پاکستانه د بېرته ستنو شوو افغان کورنیو ستونزې

پاکستان وايي د اخراج کمپاين ېې یوازې پر افغانانو نه، بلکې پر نورو بهرنیانو هم عملي کيږي.

 د ماشومانو د ملاتړ صندوق وايي له پاکستانه افغانستان ته افغان مهاجرې کورنۍ «تقریباً له نشتو امکاناتو» سره بېرته ستنيږي چې د ټولو مهاجرو نژدې نيمايي برخه ېې ماشومان دي.

د دغه سازمان په وینا د ستنو شوو ماشومانو نژدې دوه دريمه برخه ېې په ښوونځيو کې شامل شوي نه دي.

اکثريت بېرته ستنو شوو دغه سازمان ته ويلي دي چې دوی په ښوونځيو کې د ماشومانو د راجستر او شاملېدو له پاره اړين اسناد نه لري.

دا په داسې حال کې ده چې د ماشومانو د ملاتړ صندوق وايي د دغو ماشومانو څه باندې دوه پر دریمه برخه د پاکستان په ښوونځو کې شامل ول.

د دغو کورنيو په هکله د یاد سازمان یوه سروې ښيي چې ټولې دغه کورنۍ د راتلونکې یوې تر دوو میاشتو له پاره په کافي اندازه خواړه نه لري. ځينې کورنۍ اړ شوي چې د ډوډۍ رانيولو له پاره له نورو کورنيو پیسې پور کړي او یا ېې د خپلوانو او ملګرو په کورونو کې اړولي دي.

د دغو کورنیو يوه بله اضافی ستونزه د نجونو د تعلیم په برخه کې ده، چې هغوی د طالبانو حکومت د امر مطابق نشي کولی له شپږ ټولګي وروسته خپلو زده کړو ته ادامه ورکړي.

د افغانستان له پاره د ماشومانو د ملاتړ صندوق مشر ارشاد ملک وايي د ګڼ شمېر مهاجرو بېرته ستنېدا، د مخکنیو کمو امکاناتو پر ستونزې یو بل اضافي فشار ایجاد کړی دی.

ملک وايي: «اکثره له اسناد پرته افغان ماشومان په پاکستان کې زېږېدلي دي.» هغه زیاتوي: «افغانستان داسې ځای نه دی څرنګه چې هغوی ورته کور وايي. له پاکستانه د ستنو شوو علاوه، تېرکال له ایرانه هم ۶۰۰زره افغانان رسيدلي دي.»

خو د طالبانو د مهاجرو د چارو وزارت یو ویاند، عبدالمطلب حقاني، وويل چې د هر هغه ماشوم له پاره تعليمي امکانات موجود دي کوم چې د تعلیم بهیر ېې له لاسه ورکړی وي: «هغوی که اسناد ولري او که نه، کولی شي په هر ټولګي کې شامل او زده کړو ته ېې ادامه ورکړي.» حقاني زیاته کړه: «دغه ستونزه زموږ له خوا حل شوې ده.»

پاکستان له څو میاشتو راهیسې د هغو بهرنیانو د اخراج کمپاین پيل کړی دی چې په دغه هېواد کې د اوسېدو قانوني اسناد نه لري چې په دې ډله کې ۱ اعشاريه ۷ ميليونه افغان مهاجر هم شامل دي. پاکستان ټينګار کوي چې دغه کمپاین یې مستقیم د افغان مهاجرو پر ضد نه، بلکې نور بهرنيان هم په بر کې نيسي.

   (AP)mks/nz

له آرشیف څخه (03.01.2024):