وولف: يووالی او تفاهم د ژوند لوړي ښېګڼي دي
۱۳۸۹ دی ۴, شنبه
کريستيان وولف وويل:« يووالي، تفاهم او يو بله سره جوړيدل هغه ښيګني دي چي موږ يي په کورني، په خپل شخصي ژوند او د ټولني په ټولو برخو کي ورته اړتيا لرو.»
وولف د خپل هيواد له خلکو څخه وغوښتل:« دغه يادي سوي ښيګڼي په خپله نه ترسره کيږي.د هغو لپاره موږ بايد يوڅه وکړو.»
هغه زياته کړه:« د هغو خلکو په استازيتوب چي د ټولنيز خدمتونو لپاره ځان وقف کړي او مسووليت يي په غاړه اخيستي، ما نن د جمهوري رياست ماڼي Bellevue، ته بللي دي. هغوی سږ کال خپل وخت او خپل کار د نورو لپاره وقف کړی دی.»
کريستيان وولف چي له نيم کال څخه را په دي خوا د آلمان ولسمشر دی د مسيحي ميلاد د اختر د لمانځني په مناسبت د آلمان د پخوانيو ولسمشرانو پر خلاف د خپل وينا د وړاندي کولو لپاره يو نوې لاره غوره کړه.
د آلمان پخوانيو ولسمشرانو دغسي ويناوي يوازي د تلويزيون او راډويو له لاري خلکو ته اورولی دی.
خو نوي ولسمشر د خپل ټولني د ټولو پرګڼو په استازيتوب چي د يو کال په موده کي يي ټولني ته د ستايني وړ خدمتونه کړي دي يو غوڼدي ته راووبل او خپله وينا يي هغوي ته وړاندي کړه.
د ولسمشري په ماڼي کي د 190 بلل شوو ميلمنو په جمله کي زدکونکي، د ټولنيزو انجمنونو اواتحاديو افتخاري کارکونکي، د کليساو راهبي، پالندويان او د پوليسو استازو ګډون درلود.
کريسيتان وولف هغو ته په خطاب کي وويل:« تاسي په آلمان کي د 23 مليونو فعالو افتخاري کارکونکو په استازيتوب نن دلته حضورلري.»
د وينا په وخت کي د ولسشمر مشر مېرمن او د هغه زامن چي يو يې د نوي مېرمني او بل يي د پخوانۍ مېرمني څخه دي، هم په دي ستره غونده کي ګډون درلود.
ولسمشر وولف د دولت او د خلکو مکلفيتونو ته په اشاري سره وويل:« دولت د خپلو امکاناتو په چوکاټ کي کولای سي چي اړو انسانانو ته په سختو شرايطو کي مرسته وکړي. خو د دي لپاره يو چا ته سړي ډادينه ورکړي، يو چاته د ښه کار لپاره شاباسي ورکړي او يا يو چاته سړي لاس ورکړي، د دي لپاره انسان بشري خواخوږيو ته ضرورت لري. ښکاره خبره چي يو څوک له چا سره ښه وکړي، هرمرو ښه يي ور په برخه کيږي.»
وولف په خپلي وينا کي دغه راز يو بل ته د درناوي درلودلو لپاره غږ وکړ. هغه وويل: « زمونږ ټولنه آزاده او له مختلفو رنګونو څخه جوړه شوي ده. مونږ د ژوند په مختلف دنياوو کي اوسيږو. د نسب له لحاظه، د دين لحاظه، د زدکړي له لحاظه او د ارمانونو لحاظه مونږ يو بل سره توپير لرو.»
د آلمان ولسمشر زياته کړه: « د دي لپاره چي دغه ټولنه د خپل څو ډول توب سره پايښت ولري، يو بل ته درناوي درلودل تر ټولو مهمه ښيګنه ده.» هغه وويل چي د درناوي څخه مقصد دا دي چي «يو انسان بل انسان ته په دي معني درناوي ولري چي هغه هسي نه دی لکه چي دی خپله دی.»
هغه وړاندي وويل: « انسان بايد د بل خدمت او کار ته په درنه سترګه وګوري. درناوي ماشومانو او د هغوي اړتياوته، درناوي د ميندو او پلارنو کار او خدمت ته او درناوي د زړو خلکو پخوانيو خدمتونو ته، دا ټول هغه څه دي چي مونږ يو بل سره تړي.»
يو والي، تفاهم او يو بل سره د جوړيدو ارزښتونه د ولسمشر وولف په نظر د آلمان او په نړي کي د هغه له نور شريکانو سره هم صدق کوي. هغه وويل :«زمونږ هيواد ته، زمونږ آزاده او ځغم لرونکي ټولني ته، د نورو سترو او کوچنيو هيوادونو په وړاندي زمونږ اعتماد او باور ته په ډيره درنه سترګه کتل کيږي.»
وولف يادونه وکړه: آلمان نورو ته د لاس ورکولو او دغه راز په راتلونکي کي هم د مسووليت د منلو لپاره چمتو ؤ او چمتو دی، په اروپا او نړي کي.» هغه تينګار وکړ: « مونږ له خپلو شريکانو څخه هم دغسي انتظار لرو.هرڅوک بايد خپله ورسپارله شوي دنده تر سره کړي.
ولسمشر په خپله وينا کي د آلمان د ملي پوځ ، پوليسو او ملکي کارکونکو ته چي په بهر کي خدمت کوي په خطاب کي وويل:«زمونږ ځيني وطنوال د عسکرو، پوليسو او يا د ملکي کارکونکو په توګه په بهر کي دي ترڅو پرمختيايي پروژو کي مرسته وکړي، په نړي کي د سولي او امن په ټينګښت کي ونډه واخلي او د تروريزم پر ضد وجنګيږي.مونږ له دوي سره او د هغو له کورنيو، د ژوند شريکانو او د هغوي له ميندو او پلارنو سره چي په خاصه توګه په همدي شپو او ورځو کي د بيلتون شيبي تيروي، په فکر کي يو او ورسره خواخوږي لرو.»
آژانونسونه، د آلمان غږ راډيو/ عبدالباري حکيم
کتونکي: احمد ولي اڅکزي