يونيسف په شمالي وزيرستان کې د نجونو ښوونځي تخريب غندلی دی
۱۴۰۳ اردیبهشت ۲۱, جمعه
د سيمې د پوليسو يوه مشر امجد خان، وويل چې پر ښوونځی دا بريد د چهار شنبې په شپه شوی دی. د نوموړي په خبره دا ښوونځی د شمالي وزيرستان د شيوا سيمې د نجونو يوازنی ښوونځی دی.
دغه چارواکي زياته کړې ده چې بريد کوونکو د «عافيه» په نوم دغه ابتدايي ښوونځی کې چېرې چې ۱۵۰ نجونې په زده کړو بوخته دي، چاوديدونکي مواد ځای پر ځای کړي ول. زياته شوې ده چې د ښوونځي ساتونکی د وسله والو له خوا وهل ډبول شوی او تېښتې ته اړ شوی وو.
په دې پېښه کې چا ته ځاني زيان نه دی رسېدلی.
د پېښې پړه په سملاسي توګه چا پر غاړه نه ده اخيستې، خو شک یې پر داعش ډلې باندې کيږي چې په ماضي کې یې هم په خيبر پښتونخوا ايالت کې د نجونې ښوونځي په نخښه کړي او په دې عقيده دي چې ښځې بايد تعليم ونه کړي.
يونيسف: «دا يو د کرکې وړ عمل دی»
له ماشومانو سره د ملګرو ملتونو د مرستي ادارې (UNICEF) د پنجشنبې په ورځ دغه بريد په کلکو ټکو غندلی او دا یې يو د «کرکې وړ او بزدلانه عمل بللی دی چې کیدای شي د ډېرو ځوانو او استعداد لرونکو نجونو راتلونکی له خطر سره مخامخ کړي».
په پاکستان کې د يونيسف استازي عبدالله فاضل، د يوې اعلامیې په ترڅ کې وويل چې په يوه لیرې پرته سيمه کې د «نجونو د ښوونځيو تخریبول» يو ناوړه کار دی چې د هېواد د پرمختګ له پاره زيانمن تماميدلای شي.
نوموړي د پاکستان د لومړي وزیر شهباز شريف، د چهار شنبې ورځ يوې اعلامیې ته په اشارې سره وويل چې دوی د نجونو د زده کړو په برخه کې د بيړني وضعيت په اعلانولو سره د ۲۶ ميليونو ماشومانو چې ښوونځيو ته نه ځي، په ښوونځيو کې د شاملولو له پاره په هلو ځلو لاس پورې کړی دی.
په پاکستان کې تر ۲۰۱۹م کال پورې د نجونو پر ښوونځيو څو بريدونه وشول، په ځانګړي توګه په سوات او په شمال لویدیځو سيمو کې چېرې چې څو کاله پاکستاني طالبانو په دې پخوانيو قبايلي سيمو کې کنترول په لاس کې درلود.
وسله والو په ۲۰۱۲م کال کې د هغه وخت پر زده کوونکې ملالې يوسفزۍ، هم برید وکړ چې وروسته یې بيا د نجونو د زده کړو په برخه کې د هلو ځلو له کبله د نوبل د سولې جایزه ترلاسه کړه.
پاکستاني طالبان چې د تحريک طالبان پاکستان يا ټي ټي پي په نامه هم ياديږي، بيا د پوځي عملياتو په ترڅ کې له دغو سيمو وشړل شول.
ب. ص/ ن. ز (AP)
زموږ له آرشيف څخه: