ایران: د نهو پاکستاني اتباعو د قتل په اړه تحقیقات پيل شوي
۱۴۰۲ بهمن ۸, یکشنبه
د رويټرز خبري آژانس په حواله، په تهران کې د پاکستان سفير د شنبه په ورځ وويل چې د ایران په سیستان بلوچستان ایالت په سراوان ښار کې د ۹ پاکستاني اتباعو په وژنې سره «ډېر شوکه» شوی دی.
سفير محمد مدثر تیپو، دغه پېښه وحشتناکه بللې ده. هغه ويلي دي: «په ایران کې د پاکستان سفارت به د وژل شوو کسانو له کورنيو څخه بشپړ ملاتړ وکړي او له ایران څخه مو غوښتي چې دغې قضيې ته د رسيدګۍ له پاره دې بشپړه همکاري وکړي.»
د پاکستان د بهرنيو چارو وزير هم پر اکس (پخواني ټويټر) شبکه په ایران کې په «ېوه تروریستي حمله» کې د خپل هېواد د اتباعو پر وژنه خپګان ښودلی دی. جليل عباس جیلاني ټینګار کړی چې «دغه شنیع حمله د ایران او پاکستان تر منځ د روابطو د خرابوالي په موخه یوه هڅه ده چې زموږ د ګډو دښمنانو له خوا شوې ده.»
جيلاني د پېښې د قربانیانو له کورنيو سره د غمشريکۍ تر څنګ، له ایراني چارواکو غوښتي چې د دغو پاکستاني اتباعو د قتل دوسيې ته دې فوري رسيدګي وکړي.
د ايران د خارجه وزارت ویاند، ناصر کنعاني هم د سراوان ښار په څنډه کې دغه «وسلوال اقدام» په کلکه غندلي دی او د پاکستان حکومت او د قربانيانو له کورنيو سره ېې خپله غمشريکي ښودلې ده.
په ایران کې د تسنیم خبري آژانس د رپوټ پر اساس، کنعاني وويل چې د پېښې په تړاو تحقیقات پيل شوي دي. هغه وويل: «ایران او پاکستان به دښمنانو ته د دې اجازه ورنکړي چې د دواړو هېوادونو دوستانه اړيکو ته زیان ورسوي.»
د هالویش په نوم د بشري حقونو یوې ويب پاڼې په سراوان ښار کې د شنبې په شپه د وژل شوو ۹ پاکستاني اتباع نومونه خپاره کړي دي. دغې ويب پاڼې دغه افراد د ملک اظهر، محمد شعیب، محمد عاصف، محمد اکمل، محمد ابوبکر، شهریار، محمد بشیر، محمد زبیر او د محمد شهزاد په نومونو ښودلي دي.
په دغه پېښه کې درې تنه نور ټپیان شوي هم دي چې نومونه يې محمد اصغر، اشفق او عثمان دي.
د ایران په سیستان بلوچستان ایالت کې چې پاکستان سره ګډه پوله هم لري دغه خونړۍ پېښه داسې وخت رامنځ ته کيږي چې په وروستيو ورځو کې پاکستان او ایران د یو بل په خاورو کې توغندیزې حملې وکړې. دواړه هېوادونه وايي چې په دغو حملو کې ېې د اورپکو پټنځایونه په نخښه کړي دي.