پاکستان؛ د سیلاب ځپلو سیمو له پاره د ۸ ميليارد ډالرو غوښتنه
۱۴۰۱ دی ۱۹, دوشنبه
د پاکستان صدراعظم شهباز شریف د دوشنبې په ورځ په جنیوا کې له پاکستان سره د مرستندویه هيوادونو د نړیوال کنفرانس په پیل کې وویل، چې هېواد یې د تېر کال د سېلابونو د زیانونو د مخنیوي له پاره په راتلونکو درو کلونو کې اته میلیارده ډالرو ته اړتیا لري.
اړوند مطلب: پاکستان: د سيلابونو د لا ډيرېدو خبرداری؛ د مړو شمیر له زرو اوښتی
په دې کنفرانس کې د شاوخوا ۴۰ هېوادونو استازي او دغه راز د خصوصي بسپنه ورکوونکو او نړیوالو مالي بنسټونو استازو ګډون کړی.
د شریف په وینا، د سېلاب ځپلو سيمو د بيارغونې ټول لګښت څه باندې ١٦ ميليارده ډالره اټکل شوى دى.
د ملګرو ملتونو سرمنشي انتونیو ګوتریش له مرسته کوونکو هېوادونو غوښتي چې له پاکستان سره مرسته وکړي. هغه وویل پاکستان د اقلیم د بدلون قرباني دی.
په پاکستان کې د سیلابونو په پایله کې ۱۷۰۰ کسانو خپل ژوند له لاسه ورکړ او میلیونونه نور زیانمن شوي دي. ډېرو خلکو خپل کورونه له لاسه ورکړي دي.