کرونا؛ په بریتانیا کي تر ایټالیا هم ډیر کسان مړه سوي
۱۳۹۹ اردیبهشت ۱۷, چهارشنبه
د امریکا د جانس هوپکین پوهنتون د ارقامو پراساس د بریتانیا په شاهي هیواد کي په دې منځ کي د کرونا نوي ویروس تر ۲۹۵۰۰ کسان هم اضافه مړه سوي دي. په دې ډول سره په انګليستان کي تر ایټالیا هم ډیر انسانان مړه سوي دي، هغه هیواد چي ډیر وخت د کرونا پانډمي سره لاس او ګریوان ؤ.
ایټالیا د می میاشتي پر ۵مه د ۲۹۳۱۵ کسانو د مړه کیدو خبر ورکړ، چي تر انګليستان ۳۳۶ تنه کم دي. په ایټالیا کي اوس د کرونا بحران تر ډیره حده پوري آرام سوی هم دی او په تیرو ۲۴ ساعتونو کي یوازي ۱۰۷۵ کسان نوي په اخته سوي دي. مجموعأ هلته ۲۱۳۰۱۳ کسان په کرونا اخته دي.
بیا په بریتانیا کي په عین وخت کي ۴۰۰۰ کسان په کرونا باندي اخته سوي او تر ۶۰۰ تنه اضافه ورڅخه مړه سوي هم دي. د هغو کسانو تعداد چي لا معلوم نه دی، په مراتبو به تر دې ډیر وي.
یوازنی هیواد چي تر انګليستان لا هم ډیر انسانان پکښې په کرونا اخته او مړه سوي دي، امریکا متحده ایالات دي چي تر ۷۱۰۰۰ اضافه کسان پکښې مړه دي. خو کارپوهان ددې څخه خبرداری ورکوي، چي د هیوادونو تر منځ دي دا ډول مقایسه تر سره سي. ځکه چي د هر هیواد میتودونه د هغوی د نفوسو، عمرونو او نورو فکټورونو په حساب فرق سره کوي.
د صدراعظم جانسن پر بحراني کمیټه باندي انتقاد
بریتانیا ته اصلاً د کرونا ویروس نسبتاً وروسته ورسید. د صدراعظم بوریس جانسن پر حکومت باندي د کرونا د بحران سره د چلند په ارتباط سخت انتقادونه موجود دي. د یوې تازه نظر پوښتني پراساس دوه پر دریمه پوښتل سوو کسانو ویلي دي، چي حکومت د فاصلې نیولو په موضوع کي ډیر وروسته عمل وکړ.
ډیر بریتانویان پر جانسن باندي تور لګوي، چي د کرونا ویروس د شیوع په مقابل کي یې ډیر وروسته عکس العمل وښووئ. سربیره پردې په دغه هیواد کي د نورو تر څنګ حفاظتي تجهیزات، تنفسي وسایل، ډاکټران او نرسان کمبود دي.
خو جانسن بیا ددې برعکس د حکومت د رفتار څخه دفاع وکړه. جانسن چي په دې منځ کي پخپله په کرونا اخته سوی او باید په عاجل سرویس کي معالجه سوی وای، وویل،چي «موږ پرخپل وخت سم اقدامات کړی دی.»