Vazhdojnë trazirat në Irlandën e Veriut

Belfasti nuk po gjen qetësi: rreth 60 policë janë plagosur dhe më shumë se 100 të dyshuar për akte vandale janë arrestuar. Në natën e gjashtë me radhë demonstrues të dhunshëm sulmuan me mjete zjarri, shishe dhe gurë, forcat e policisë në kryeqytetin irlandez. Konfrontimet e ditëve të fundit janë më të rëndat në provincë që prej marrëveshjes së paqes në vitin 1998, e cila i dha fund pas gati tre shekujsh konfliktit të Irlandës së Veriut.

Trazirave të fundit i parapriu një demonstrim kryesisht paqësor. Shkak për të u bë një zënkë për flamurin britanik. Administrata e qytetit të Belfastit vendosi në fillim të dhjetorit që flamuri të ngrihet mbi ndërtesat publike vetëm në pak ditë festash gjatë vitit, si p.sh. për ditëlindjen e Mbretëreshës. Që atëherë demonstrojnë luajalistët, të cilët i tremben një shkëputjeje të mundshme të Irlandës së Veriut nga Britania e Madhe.

Instrumentalizim nga militantët

Edhe fundjavën e kaluar Belfasti u trondit nga konfrontime të dhunshme. Disa individë të dhunshëm qëlluan mbi policinë, hodhën gurë, shishe dhe lëndë zjarri. Një burrë 38-vjeçar u akuzua për tentativë vrasje. Policia veri-irlandeze bëri të ditur se grupe pro-britanike kanë shfrytëzuar momentin dhe po i përdorin trazirat e forta për qëllimet e tyre. Edhe në dhjetor grupet militante u fajësuan se ishin bashkëorganizatorë dhe pjesëmarrës në valën e parë të dhunës. Sulmet e fundit i konfirmojnë këto supozime.

Shqetësime për trazirat

Politikanë të lartë në Irlandën e Veriut e kanë dënuar valën e dhunës. David Ford, kryetar i partisë liberale Alliance Party deklaroi se dhuna që vlon prej ditësh në lindje të Belfastit "duhet kritikuar me gjithë ashpërsinë e mundshme". Alliance Party e pati mbështetur vendimin për reduktimin e ditëve, kur mbi ndërtesat publike ngrihet flamuri britanik. Ford bëri thirrje për një takim të të gjitha partive kryesore brenda kësaj jave për të demonstruar "angazhim të vërtetë për ndërtimin e një të ardhmeje të përbashkët".

Pakënaqësi e fshehtë

Edhe pse sipas analistëve bëhet fjalë për një numër të vogël demonstruesish të dhunshën, ndërkohë që pjesa më e madhe janë paqësorë, ata janë të një mendje se palët janë të pakënaqura me atë që e perceptojnë si pabarazi në investime dhe infrastrukturë. Kryesisht punëtorët nga lagjet protestante ndihen të neglizhuar.

Si pasojë e krizës financiare në Irlandën e Veriut ka pak vende pune me kontrata pa afat. Analistët druajnë se trazirat e javëve të fundit mund ta përkeqësojnë situatën. Turistët mund të tremben nga ato çka mësojnë nga mediet për situatën në Irlandën e Veriut. Edhe investuesit mund ta konsiderojnë atë si rajon të paqendrueshëm.