BAYERN MUNICH WATWAA TAJI LAO LA 19 LA BUNDESLIGA

BUNDESLIGA:

Kanzela Gerhard Schröder wa Ujerumani, alitoa jana pongezi zake kwa Bayern Munich,kufuatia ushindi wao kutwaa kwa mara ya 19 ubingwa wa Ujerumani.Munich iliizaba Kaiserslauten mabao 4-0 hapo jumamosi na hivyo kutawazwa mabingwa hata kabla mechi 2 kumalizika kuhetimisha msimu huu.

Katika risala yake Kanzela Schröder alisema na ninamnukulu,

“Bayern Munich inastahiki ubingwa na mimi ninawanyoshea mkono wa pongezi kwa timu, kocha wao na hata kwa mashabiki wao”

Mapema katika msimu huu, Schröder aliwahi kusema angependelea sana kuwa Schalke 04 kutawazwa mabingwa ,lakini matamanio yake hayo hayakutimilia.

Schalke na Bayern Munich zitakumbana tena mjini Berlin hapo mei 28 kwa finali ya kombe la shirikisho la dimba la Ujerumani DFB Pokale.

Bayern Munich imetawazwa mabingwa wakiwa na pointi 68 kwa 57 za schalke, huku Stuttgart ikinyatia nafasi ya 3 kwa pointi 55. Mabingwa Werder Bremen waliovuliwa taji wameangukia nafasi ya 4 wakiwa na pointi 53 sawa na Hertha Berlin.

Mkiani mwa Bundesliga:klabu 3 zaelekea zitateremshwa daraja ya pili.Hadi sasa mechi 2 zikiwa zimesalia, ni wazi kabisa kwamba SC Freiburg imeshateremshwa daraja ya pili.Hatima ya Hansa Rostock na VFL Bochum bado haijulikani,lakini zote 2 zaweza nazo kuteremshwa chini.

Katika orodha ya watiaji magoli:Marek Mintal kutoka Slovakia angali akiongoza kwa mabao yake 22 akifuatwa na Mbrazil Marcelinho anaeichezea Hertha Berlin.

Katika Premier League-Ligi ya Uingereza, chelsea nayo imeshalitia mfukoni Taji lake la ubingwa-miaka 50 baada ya ushindi wake wa mwisho wa Kombe hilo.Chelsea iliizaba Bolton Wonderous mabao 2:0 na kuvaa taji hilo la ubingwa.

Sasa Chelsea inajiwinda kwa changamoto ya kesho ya duru ya pili ya nusu-finali ya Champions League-kombe la klabu bingwa barani Ulaya kati yake na Liverpool .Ikishinda pengine itacheza finali na AC Milan ya Itali ilioitoa PSV Eindhoven ya Holland mabao 2:0 mjini Milan.

Katika La Liga-Ligi ya Spain taji pia laonesha litakwenda kwa FC Barcelona ambayo ilibakisha mwishoni mwa wiki mwanya wake wa pointi 6 mbele ya Real Madrid.

Barcelona iliizaba Albacete mabao 2:0.Mchezaji bora wa mwaka wa Africa,Samuel Eto’o wa Kamerun alitia hapo bao lake la 22 msimu huu na ndie anaeongoza orodha ya watiaji magoli mengi nchini Spain.Ronaldo wa Real madrid ameangukia nafasi ya tatu kwa magoli yake 18 huku Diego Forlan akimfuata Eto’0 nafasi ya pili kwa mabao yake 20.

Kombe la Dunia la FIFA World Cup likiwa bado zaidi ya mwaka mmoja kuanza hapa Ujerumani, leo imeanza awamu ya pili ya kuuza tiketi za Kombe hilo chini ya mango anaenunua kwanza ni tiketi yake.Kiasi cha tiketi laki 2 zaweza kununuliwa kupitia mtandao rasmi wa WWW.FIFAWORLDCUP.COM.

Katika hatua ya kwanza jumla ya tiketi 812 ziliuzwa .

Kamati ya maandalio ya Kombe la dunia ya ujerumani ililitaka kampuni la mnada la EBAY kupiga marufuku uuzaji tiketi za Kombe la dunia kwa njia za kimagendo.Ebay imedai hakuna anaevunja sheria na kuuza tiketi kimagendo.Bei za tiketi za Kombe la dunia zinaanzia Euro 35 hadi 600.

Kombe lenyewe la dunia litaanza Juni 9 hadi Julai 9 atakapotawazwa bingwa mpya wa dunia.

Kabla ya hapo Juni ijayo,timu 8 zitakuja Ujerumani kufungua pazia la kombe la Dunia la mwakani zikishiriki katika Kombe la mashirikisho-Confederations Cup.Miongoni mwa timu hizo mbali na Brazil na Argentina, ni mabingwa wa Afrika Tunesia.