Bundesliga yashuhudia mvua ya mabao

Siku ya Jumamosi Bayern Munich waliicharaza Darmstadt mabao 8 bila jibu katika uga wa nyumbani Allianz Arena. Jumla ya kadi tatu nyekundu zilionyeshwa wachezaji Joshua Kimmich wa Bayern, Klaus Gjasula na Matej Maglica wa Darmstadt.

Soma pia: Kane atetemesha Bundesliga

Mshambuliaji Harry Kane aliendeleza rekodi nzuri ya ufungaji mabao na kwa mara ya pili katika Bundesliga akafunga mabao matatu kwenye mechi moja.

"Umekuwa mwanzo mzuri kufikia sasa, nadhani tumekuwa na mchezo mzuri leo, sio mimi tu lakini timu yote. Ninafuraha na ninafurahia kila dakika ya uwepo wangu hapa na klabu pamoja na mashabiki. Na kufunga Hatrick katika uga wa nyumbani ni hisia ya kipekee." Alisema Kane baada ya mechi.

RB Leipzig ilisherehekea ushindi mnono wa 6-0 nyumbani dhidi ya FC Köln, Dortmund walitoka nyuma mara mbili na kuambulia pointi moja katika mechi kali iliyokamilika kwa sare ya 3-3 dhidi ya Eintracht Frankfurt katika uwanja wa Deutsche Bank Park.

Leverkusen moto wa kuotea mbali

Florian Wirtz alifunga bao maridadi na kufungua njia kwa vijana wa Xabi Alonso wa Bayer Leverkusen kuwalaza Freiburg 2-1 jana Jumapili na kurudi kileleni mwa jedwali la Bundesliga. 

Hoffenheim iliendeleza matokeo mazuri ugenini kwa ushindi wa 3-2 dhidi ya wenyeji wao Stuttgart. Borussia Moenchengladbach ilivuna mabao 2-1 dhidi ya Heidenheim. Union Berlinikaendelea kutandikwa kwa kipigo cha 2-0 kutoka kwa Werder Bremen. Bochum na Mainz zikatoka sare ya 2-2 na Ausburg ikaifunga Wolfsburg 3-2.