Jeshi la Israel lashambulia vikali eneo la kusini mwa Gaza

Mashuhuda wameripoti mashambulizi makali ya mabomu na makombora katika mji wa Khan Younis, kusini mwa mji mkuu wa Gaza ambako majeshi ya Israel yaliondoka mapema mwezi Aprili baada ya vita vikali vya miezi kadhaa.

Kulingana na chanzo cha hospitali katika mji huo, watu wanane wameuwawa na wengine 30 kujeruhiwa.

Haya yanajiri huku wakati kukiripotiwa shambulizi kwenye kambi ya wakimbizi ya Nuseirat ambapo mtoto mmoja aliuwawa, kwa mujibu wa Hilali Nyekundu ya Palestina.

Maeneo mengine ya Ukanda wa Gaza yamendelea kuathirika kutokana na mapigano ya karibu miezi tisa yaliyochochewa na shambulio la Hamas la Oktoba 7 dhidi ya Israel.