Israel yamuua kiongozi mpya wa Hamas Yahya al-Sinwar

Israel imethibitisha kwamba vikosi vyake vimemuua kiongozi mpya wa kundi la Hamas Yahya Sinwar kufuatia operesheni yake katika Ukanda wa Gaza. Waziri wa mambo ya nje Israel Katz amethibitisha kifo cha kiongozi huyo wa Hamas aliyekuwa akisakwa, baada ya taarifa za awali za kufariki kwake kusambaa.

Waziri Mkuu wa Israel Benjamin Netanyahu amesifu kuuawa kwa kiongozi huyo katika ujumbe wake wa vidio kwa wakaazi wa Gaza jana jioni. Amesema huo sio mwisho wa vita huko Gaza, bali ni mwanzo wa mwisho na fursa kwa wakaazi wa Gaza kujikomboa kutoka utawala dhalimu wa wanamgambo.

Sinwar, anachukuliwa kama mratibu mkuu wa shambulio la Oktoba 7 mwaka 2023 dhidi ya Israel ambalo lilisababisha vifo vya karibu watu 1,200 huku mamia ya wengine wakichukuliwa mateka. Alichukua nafasi hiyo kufuatia mauaji ya Ismail Haniyeh aliyeuawa mjini Tehran Agosti.