Vijana wanaougua saratani waongezeka, Kenya

Rita Opondo, (23) aligundua kuwa anaugua saratani ya matiti alipofika kufanyiwa vipimo baada ya kuhisi uvimbe kwenye titi lake.

Baada ya vipimo hivyo, alipata mawazo mengi na hasa alipoelezwa kwamba atakatwa titi lake. Kama haitoshi, kizingiti kingine kilikuwa ni kuwaarifu ndugu zake ambao tayari walimpoteza mmoja wao kutokana na ugonjwa huu, mbali na gharama kubwa za matibabu.

Wahudumu wa afya wanasema kuna umuhimu mkubwa wa kuendesha uhamasishaji miongoni mwa vijana ikizingatiwa kundi hili la raia mara nyingi hawaamini kwamba wanaweza wakapata saratani, ugonjwa huu ukiwa ungali unahusishwa na watu walio na umri mkubwa.

Kulingana na muungano wa mashirika ya saratani nchini Kenya, takwimu za sasa za maradhi ya saratani miongoni mwa vijana ni virusi vya HPV vinavyosambazwa kwa ngono vikihusishwa na ongezeko hili wito ukitolewa kwa vijana kuwa makini katika mahusiano yao ya kimwili.

Soma pia:Mamilioni ya watu hatarini kukumbwa na maradhi kutokana na kutofanya mazoezi 

Uhamasishaji zaidi unahitajika

Rose Atieno kutoka Shirika la Afya For Africa anasema kando na uhamasishaji wa saratani mfano mwezi wa Oktoba kila mwaka ambapo uhamasishaji wa saratani ya matiti unaendelea, kuna haja ya kampeni zaidi kuendeshwa mitandaoni na katika taasisi za elimu kuanzia kiwango cha chini hadi juu.

Anahimiza umuhimu wa serikali kuimarisha mifumo ya hudumu ya afya katika kitengo cha saratanikusaidia kupunguza gharama na walioathirika kujiunga na makundi yatakayosaidia kutoa ushauri nasaha na kuhakikisha pia afya ya akili ya wahusika inasalia imara katika safari ya matibabu ya saratani.

"Saa zingine unakutana na mtu kutaka kumueleza kuhusu saratani na kuona ni vipi unaweza kumsaidia."

Tizama pia:

Kutafuta matibabu mapema kunasaidia pakubwa kupambana na kusambaa kwa maradhi haya na kuokoa maisha.