Korea Kaskazini yafanya majaribio ya Droni za kulipuka

Vyombo vya habari vya umma nchini Korea Kaskazini vimeripoti mapema leo kwamba nchi hiyo imefanya majaribio ya ndege zisizo na rubani zenye uwezo wa kulipuka na kulenga shabaha, wakati kiongozi wa nchi hiyo Kim Jong Un akihimiza uzalishaji wa silaha hizo kwa wingi.Korea Kaskazini yajiandaa kufanya jaribio la nyuklia

Kwa mujibu wa shirika la habari la Korea Kaskazini KCNA, Kim ameonyesha kuridhishwa na mchakato wa kutengeneza silaha akibainisha jinsi ndege za Droni zinavyozidi kuwa na umuhimu katika vita vya kisasa.

Majaribio hayo ya hivi karibuni yanafanyika wakati Marekani, Korea Kusini na Japan zikifanya luteka za pamoja za kijeshi zinazojumuisha ndege za kivita za hali ya juu.

Aidha pia manowari ya Marekani imeripotiwa kuwa ilikuwa imepiga kambi karibu na mipaka ya kimataifa kama ishara ya ulinzi wa mataifa hayo dhidi ya Pyongyang.