Marekani: Viwango vya haki za binadamu vinapungua duniani

Waziri wa mambo ya nje wa Marekani Antony Blinken amesema kwa miaka mingi sasa wameshuhudia viwango vya juu vya kushuka kwa demokrasia, utawala wa sheria na haki za binadamu katika pande nyingi za ulimwengu.

Aliyasema hayo alipokuwa akitoa ripoti ya kila mwaka ya wizara yake kuhusu haki za binadamu. 

Blinken ametaja vita vya kikatili vinavyoendelezwa na Urusi nchini Ukraine kama moja ya sababu mbaya zaidi ya kushuka kwa haki za binadamu, huku akivishutumu vikosi vya Urusi kwa unyama ulioenea katika maeneo waliyochukua.

Blinken pia ameishutumu China kwa kufanya mauaji ya halaiki dhidi ya Waislamu walio wachache wa Uyghur, na vilevile Taliban kufuatia kamatakamata yake ya kiholela dhidi ya wanawake, waandamanaji na wanahabari.