1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Uchaguzi Mkuu wa Ujerumani 2025Mzozo wa Israel na HamasBundesliga
Sauti zetuVidio zetu
SiasaUkraine

Uingereza yaahidi kuihakikishia Ukraine usalama

16 Januari 2025

Waziri Mkuu wa Uingereza, Keir Starmer, ameahidi kushirikiana na Ukraine pamoja na washirika wake kutoa dhamana za kiusalama kwa Kyiv iwapo makubaliano ya kusitisha mapigano yatafikiwa na Urusi.

https://p.dw.com/p/4pEv2
Ukraine Kiev 2025 | Waziri Mkuu wa Uingereza Kier Starmer azuru Kiev
Starmer aahidi kuwa Uingereza itatafakari njia za kivitendo za kufanikisha amani ya haki na endelevu ambayo italinda usalama, uhuru, na haki ya Ukraine Picha: Carl Court/Getty Images

Akiwa katika ziara yake ya kwanza nchini Ukraine tangu kuchukua wadhifa wa uwaziri mkuu Julai mwaka jana, Starmer alisisitiza msaada wa Uingereza kwa Ukraine na kutoa ahadi ya ushirikiano wa miaka 100 na Rais Volodymyr Zelenskiy.

Ziara hii, ambayo ilifanyika siku chache kabla ya Donald Trump kurudi madarakani Marekani, ilijikita katika kuhakikisha Ukraine inakuwa kwenye nafasi thabiti kupambana na Urusi mwaka 2025.

Katika mazungumzo yaliyokatizwa na mlipuko uliosababishwa na mifumo ya ulinzi wa anga wa Ukraine kudungua droni ya Urusi karibu na ikulu ya rais, Zelenskiy alizungumzia haja ya kupelekwa kwa vikosi vya kulinda amani vya Magharibi ili kuzuia mashambulizi ya siku za usoni ya Urusi baada ya makubaliano ya kusitisha mapigano.

Starmer aliahidi kuwa Uingereza itatafakari njia za kivitendo za kufanikisha amani ya haki na endelevu ambayo italinda usalama, uhuru, na haki ya Ukraine kuchagua mustakabali wake.