Wapalestina wawili wauawa kwenye operesheni ya kijeshi

Wanaume hao wenye umri wa miaka 22 na 25, walipoteza maisha katika kijiji kimoja kilichoko karibu na mji wa Palestina wa Jenin. Watu wengine watatu walijeruhiwa katika oparesheni hiyo.

Kulingana na vyanzo vya jeshi, wanajeshi waliingia kwenye kijiji hicho ili kuharibu nyumba za Wapalestina wawili wanaoshukiwa kuhusika na tukio la mwezi Septemba ambapo mwanajeshi wa Israel aliuawawa.

Kituo cha redio cha jeshi la Israel kimeripoti kutokea kwa ufyatulianaji wa risasi katika mji huo wa Jenin, ambao unachukuliwa kuwa moja ya ngome za wanamgambo wa Kipalestina.

Kulingana na mamlaka katika mji wa Ramallah, jumla ya Wapalestina 172 waliuawa mwaka uliopita katika mashambulizi, idadi hiyo ikiwa kubwa tangu mwaka 2006.