امدادی سامان کی ترسیل، کابل ایئر پورٹ دوبارہ کھول دیا گیا

دبئی سے ہفتہ چار ستمبر کو موصولہ نیوز ایجنسی روئٹرز کی رپورٹوں کے مطابق افغانستان میں قطر کے سفیر کا کابل ایئر پورٹ کے دوبارہ کھول دیے جانے سے متعلق یہ بیان قطری نیوز چینل الجزیرہ نے نشر کیا۔ الجزیرہ نے کابل میں اپنے نامہ نگار کے ذریعے یہ تصدیق بھی کی کہ اب کابل سے ملک کے دیگر شہروں کو آنے جانے والی داخلی پروازیں بھی بحال ہو گئی ہیں۔

الجزیرہ ٹی وی کے مطابق افغانستان میں قطر کے سفیر نے بتایا کہ کابل ایئر پورٹ کے رن وے کی افغان حکام کی مدد سے مرمت کر دی گئی ہے اور کابل سے مزار شریف اور قندھار جانے والی دو مسافر پروازیں بھی اپنی منزلوں کی طرف روانہ ہو گئیں۔

کابل ایئرپورٹ افغان عوام کو واپس دے رہے ہیں: امریکی اسٹیٹ ڈپارٹمنٹ

افغان دارالحکومت کا ہوائی اڈہ امریکا کی طرف سے افغانستان سے اپنے شہریوں، دیگر مغربی ممالک کے باشندوں اور امریکی اور نیٹو دستوں کی مدد کرنے والے افغان کارکنوں کے انخلا کے وسیع تر عمل کی تکمیل کے بعد سے بند تھا۔

تیس اور اکتیس اگست کی درمیانی رات کابل سے ایک فوجی طیارے میں آخری امریکی دستوں کی روانگی کے ساتھ ہی ہندو کش کی اس ریاست سے تقریباﹰ بیس سالہ تعیناتی کے بعد امریکا کا حمتی فوجی انخلا مکمل ہو گیا تھا۔

افغانستان: امریکی انخلا مکمل، کابل ایئر پورٹ پر طالبان کا کنٹرول

خلیجی عرب ریاست قطر کے وزیر خارجہ شیخ محمد بن عبدالرحمان الثانی نے جمعرات کے روز دوحہ میں اپنے برطانوی ہم منصب ڈومینیک راب کے ساتھ ایک مشترکہ پریس کانفرنس سے خطاب کرتے ہوئے کہا تھا کہ قطری حکومت طالبان کے ساتھ اس بارے میں مذاکرات کر رہی تھی کہ ترکی کی طرف سے ممکنہ تکنیکی مدد کے ساتھ کابل کے ہوائی اڈے پر معمول کی فضائی سفری سرگرمیاں جلد از جلد بحال ہو سکیں۔

م م / ع آ (روئٹرز، الجزیرہ ٹی وی)