امریکا کا اپنے سفارت خانے کی مئی میں یروشلم منتقلی کا ارادہ

امریکی صدر ڈونلڈ ٹرمپ نے گزشتہ برس دسمبر میں یروشلم کو اسرائیل کا دارالحکومت تسلیم کرتے ہوئے ملکی سفارت خانے کو تل ابیب سے وہاں منتقل کرنے کا اعلان کیا تھا۔ اس سے قبل ایک طویل عرصے سے اس حوالے سے امریکی پالیسی یہ رہی کہ دارالحکومت کا فیصلہ فلسطین اور اسرائیل دونوں ریاستوں کے درمیان امن مذاکرات کے ذریعے طے ہونا چاہیے۔

گزشتہ ماہ اپنے یروشلم کے دورے کے موقع پر امریکی نائب صدر مائیک پینس نے کہا تھا کہ انہیں ملکی ایمبیسی کے سن 2019 سے پہلے یروشلم منتقل کیے جانے کی توقع نہیں ہے۔ اسرائیلی وزیر اعظم بینجمن نیتن یاہو نے امریکا کی جانب سے اس نئے اعلان کا خیرمقدم کیا ہے۔

اعلیٰ درجے کے ایک فلسطینی مذاکرات کار صائب عریقات نے جمعے کے روز کہا تھا کہ سفارت خانہ یروشلم منتقل کرنے کا امریکی فیصلہ ظاہر کرتا ہے کہ واشنگٹن حکومت بین الاقوامی قانون کی خلاف ورزی کرتے ہوئے مسئلے کے دو ریاستی حل کی کوششوں کو خاک میں ملانا چاہتی ہے۔ عریقات کے مطابق ایسا کرنے سے فلسطینی عوام کے جذبات مزید مشتعل ہوں گے۔

امریکی نائب صدر مائیک پینس نے گزشتہ ماہ اسرائیلی پارلیمان سے خطاب میں کہا تھا کہ تل ابیب میں قائم امریکی سفارت خانے کو اگلے برس کے اختتام تک یروشلم منتقل کر دیا جائے گا۔ اس موقع پر اسرائیلی پارلیمان میں بعض عرب قانون سازوں نے احتجاج کیا، تو انہیں اسمبلی سے نکال دیا گیا۔ تاہم پینس کے اس بیان کے برعکس امریکی ایمبیسی کی یروشلم منتقلی کے فیصلے پر عمل درآمد توقع سے بہت پہلے کیا جا رہا ہے۔

گزشتہ برس دسمبر میں  امریکی صدر ڈونلڈ ٹرمپ نے یروشلم کو اسرائیل کا دارالحکومت قرار دیتے ہوئے کہا تھا کہ وہ مشرق وسطیٰ کے تنازعے کے حل کے لیے ’نئی سوچ اور پالیسی‘ اپنا رہے ہیں۔ اسرائیلی وزیراعظم بینجمن نیتن یاہو نے امریکی صدر کے اس فیصلے کی تعریف کرتے ہوئے اسے ایک ’تاریخی سنگ میل‘ قرار دیا تھا۔