ایڈز کے خلاف جاری عالمی ’جنگ‘ میں اہم پیش رفت

خبر رساں ادارے روئٹرز نے بتایا ہے کہ پیر کے دن جاری کی گئی عالمی ادارے کی اس سالانہ رپورٹ کے مطابق ایڈز اور ایچ آئی وی کی وجہ سے ہونے والی عالمی اموات کی شرح میں کمی واقع ہو رہی ہے جب کہ ان امراض میں مبتلا ایسے افراد کے تعداد میں اضافہ ہو رہا ہے، جو معالجین سے رجوع کر رہے ہیں۔ اقوام متحدہ کے ایڈز کے خلاف پروگرام یو این ایڈز کے اعداد و شمار کے مطابق اس وقت دنیا بھر میں تقریباﹰ 35.3 ملین افراد ایچ آئی وی انفیکشن کا شکار ہیں۔

یو این ایڈز کی طرف سے جاری کی گئی اس رپورٹ کے مطابق 2012ء میں ایڈز سے ہونے والی اموات کی تعداد 1.6ملین رہی۔2011ء میں یہ تعداد 1.7 ملین تھی جب کہ 2005ء میں اس مہلک بیماری کے نتیجے میں 2.3 ملین افراد لقمہ اجل بنے تھے۔ یہ بھی دیکھا گیا ہے کہ اس انفیکشن میں مبتلا ہونے والوں کی شرح میں بھی کمی ہو گئی ہے۔ 2012ء میں ایچ آئی وی میں مبتلا ہونے والے افراد کی تعداد 2.3 ملین تھی جب کہ ایک برس قبل ایسے افراد کی تعداد 2.5 ملین نوٹ کی گئی تھی۔

اس مثبت پیش رفت کی وجہ علاج کی سہولیات میں بہتری بتائی گئی ہے۔ ایچ آئی وی کی وجہ سے ایڈز کی بیماری لاحق ہوتی ہے۔ یہ انفکیشن خون کی منتقلی، بریسٹ فیڈنگ اور جنسی عمل کے دوران مریض سے تندرست انسان میں منتقل ہوسکتا ہے۔ اس بیماری کے مقابلے میں antiretroviral ٹریٹمنٹ تھیراپی کافی مؤثر ثابت ہوئی ہے۔ مختلف کیمیائی اجزاء سے تیار کردہ اس دوا کے کورس کو اس بیماری کے خلاف ایک اہم ہتھیار تصور کیا جا رہا ہے۔ 2012ء کے اختتام تک غریب اور ترقی پذیر ممالک کے 9.7 ملین انسانوں تک اس دوا کو دستیاب بنا دیا گیا تھا۔ یہ دوا ایچ آئی وی انفیکشن کو ماں سے بچے کو منتقل ہونے سے روکتی ہے۔ اگرچہ یہ دوا اس بیماری کا علاج نہیں ہے تاہم اسے آگے منتقل ہونے سے روکنے میں اہم کردار ادا کرتی ہے۔

اقوام متحدہ کے مطابق 2001ء کے بعد گزشتہ برس پہلی مرتبہ ایچ آئی وی انفیکشن کا شکار ہونے والے بچوں میں باون فیصد کی کمی ہوئی ہے۔ یو این ایڈز کے ایگزیکٹو ڈائریکٹر میشل سیڈیبی نے اس امید کا اظہار کیا ہے کہ آئندہ دو برسوں کے دوران 90 فیصد نومولود بچوں میں اس انفیکشن کے منتقل ہونے کو روک دیا جائے گا۔

2011ء میں اقوام متحدہ کے رکن ممالک نے اتفاق کیا تھا کہ 2015ء تک پندرہ ملین انسانوں تک ایڈز کے علاج کی سہولیات فراہم کر دی جائیں گی۔ پیر کے دن جنیوا میں یہ رپورٹ جاری کرتے ہوئے سیڈیبی نے کہا ہے کہ اب عالمی برادری کو اس ٹارگٹ سے آگے کا سوچنا چاہیے تاکہ اس بیماری کے علاج سے کوئی شخص بھی محروم نہ رہے۔

گزشتہ برس ایچ آئی وی اور ایڈز کے خلاف جنگ پر صرف کی جانے والی عالمی امداد 18.9 بلین ڈالر رہی، جو اندازوں سے تین تا پانچ بلین ڈالر کم تھی۔ عالمی براداری کی طرف سے ترتیب دیے گئے اندازوں کے مطابق 2015ء تک HIV اور ایڈز کے خلاف جاری مختلف منصوبہ جات کے لیے سالانہ بنیادوں پر بائیس تا چوبیس بلین ڈالر کی خطیر رقم کی ضرورت ہے۔