بریگزٹ ڈیل مسترد ہونے کے بعد مے کو عدم اعتماد کا سامنا

برطانوی پارلیمان نے ملکی وزیر اعظم ٹریزا مے اور یورپی یونین کے درمیان طے ہونے والے مجوزہ بریگزٹ معاہدے کو بھاری اکثریت کے ساتھ مسترد کر دیا ہے۔ منگل 15 جنوری کی شام اس معاملے پر ہونے والے ووٹنگ کے دوران ڈیل کی مخالفت میں برطانوی پارلیمنٹ کے 432 اراکین نے ووٹ ڈالا جبکہ اس مجوزہ معاہدے کی حمایت میں 202 ووٹ پڑے۔

ان نتائج  کے بعد برطانوی پارلیمان میں اپوزیشن لیڈر جیریمی کوربین نے وزیر اعظم ٹریزا مَے کے خلاف عدم اعتماد کی تحریک پیش کی جسے ووٹنگ کے لیے منظور کر لیا گیا۔ اس قرارداد پر ووٹنگ آج بدھ شام سات بجے ہو گی۔ تاہم توقع کی جا رہی ہے کہ اس تحریک کی کامیابی کے امکانات کم ہی ہیں۔

’وقت تقریباﹰ ختم ہو چکا ہے، برطانوی حکومت فی الفور اپنے عزم واضح کرے‘

یورپی یونین اور یورپی حکومتوں نے خبردار کیا ہے کہ برطانوی پارلیمان کی طرف سے بریگزٹ ڈیل کو مسترد کر دیے جانے کے بعد اس بات کا خطرہ بڑھ گیا ہے کہ برطانیہ کو یورپی بلاک سے کسی معاہدے کے بغیر ہی نکلنا پڑے۔

یورپی کمیشن کے صدر ژاں کلود ینکر کے مطابق اب برطانوی حکومت پر لازم ہو گیا ہے کہ وہ جلد از جلد مستقبل کے حوالے سے اپنی پالیسی کا تعین کرے۔ گزشتہ شب برطانوی پارلیمنٹ کی طرف سے وزیراعظم ٹریزا مَے کی طے کردہ بریگزٹ ڈیل کو نا منظور کرنے کے بعد یُنکر کا کہنا تھا کہ یورپی یونین اور برطانوی وزیر اعظم کے درمیان جس معاہدے پر اتفاق کیا گیا تھا وہ ایک مناسب کمپرومائز تھا اور بہترین معاہدہ خیال کیا گیا تھا۔ ان کا کہنا تھا کہ اس ڈیل سے یورپی شہریوں اور کاروباری حلقوں کو برطانیہ کے اخراج کی صورت میں کم سے کم نقصان پہنچنے کا اندازہ لگایا گیا تھا۔

دوسری طرف یورپی کونسل کے صدر ڈونلڈ ٹُسک نے کہا ہے کہ یورپی یونین کے بقیہ 27 ممالک بریگزٹ کے معاملے پر متحد ہیں۔ ان کا کہنا تھا کہ اب یہ برطانوی حکومت کی ذمہ داری ہے کہ وہ آئندہ کا لائحہ عمل واضح کرے۔ ٹُسک کے مطابق یورپی یونین بریگزٹ معاہدہ طے کرنے کے لیے پر عزم ہے اور اس معاملے پر متحد ہے۔

کھیل کھیلنے کا وقت ختم ہو چکا، جرمن وزیر خارجہ

برطانوی پارلیمان کی طرف سے وزیر اعظم ٹریزا مے کی یورپی یونین کے ساتھ طے کردہ ڈیل کو مسترد کرنے پر جرمن وزیر خارجہ نے کہا ہے کہ اب کھیل کھیلنے کا وقت ختم ہو چکا ہے۔ جرمن براڈکاسٹر ’ڈوئچ لانڈ فُنگ‘ سے گفتگو کرتے ہوئے وزیر خارجہ ہائیکو ماس نے کہا کہ برطانیہ کے یورپی یونین سے اخراج کا حل نکالنے کے لیے ابھی بہت وقت موجود ہے تاہم اب ’کھیل کھیلنے کا وقت نہیں رہا‘۔

برطانوی پارلیمان میں بریگزٹ ڈیل کے معاملے پر ووٹنگ کے تناظر میں ہائیکو ماس کا مزید کہنا تھا برطانیہ اور یورپی یونین میں نئے مذاکرات کی ضرورت ہے۔

برطانیہ کے یورپی یونین سے اخراج کی تاریخ کو آگے بڑھانے کے امکان پر پوچھے گئے ایک سوال کے جواب میں جرمن وزیر خارجہ کا کہنا تھا کہ اگر ایسی کوئی درخواست یورپی یونین تک پہنچتی ہے تو یہ بلاک اس پر غور کرے گا۔

ا ب ا / ع ح (روئٹرز، اے ایف پی)